മമ്പാട് സ്‌കൂട്ടർ മറിഞ്ഞ് കുടുംബത്തിലെ രണ്ടു പേർ മരിച്ചു; രണ്ട് കുട്ടികൾക്ക് പരുക്ക്

മലപ്പുറം: മമ്പാട് കാരച്ചാൽ പൂളപൊയിലിൽ സ്‌കൂട്ടർ നിയന്ത്രണം വിട്ട് മറിഞ്ഞ് കുടുംബത്തിലെ രണ്ടു പേർ മരിച്ചു. മമ്പാട് നടുവക്കാട് ചീരക്കുഴിയിൽ ഷിജുവിന്റെ മകൻ ധ്യാൻദേവ് (3), ഷിജുവിന്റെ സഹോദരൻ നടുവക്കാട് ഫ്രണ്ട്‌സ് മൈതാനത്തിന് സമീപം ചീരക്കുഴിയിൽ ഷിനോജിന്റെ ഭാര്യ ശ്രീലക്ഷ്മി (36) എന്നിവരാണ് മരിച്ചത്.

പരുക്കേറ്റ ഷിനോജിന്റെ മകൻ നവനീത് (7), ഷിനോജിന്റെ സഹോദരി ഷിമിയുടെ മകൾ ഭവ്യ (10) എന്നിവരെ കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റിയതായി പോലീസ് പറഞ്ഞു.

ഷിജുവിന്റെ സഹോദരനായ ഷിനോജ് ആയിരുന്നു സ്‌കൂട്ടർ ഓടിച്ചിരുന്നത്. ഷിനോജും ശ്രീലക്ഷ്മിയും മൂന്ന് കുട്ടികളുമാണ് സ്‌കൂട്ടറിലുണ്ടായിരുന്നത്. കുടുംബാംഗങ്ങളോടൊപ്പം എടവണ്ണ പടിഞ്ഞാറെ ചാത്തല്ലൂർ മലയിലെ ആമസോൺ വ്യൂ പോയിന്റ് കണ്ട് മടങ്ങവെ ഇന്ന് രാവിലെ 10.30ഓടെയായിരുന്നു അപകടം.