കാസര്‍കോട് – മുഖ്യമന്ത്രിക്കെതിരായി നടത്തിയ പ്രസംഗത്തില്‍ രാഹുല്‍ ഗാന്ധിയെ ന്യായീകരിച്ച് മുസ്ലീം ലീഗ് നേതാവ് പി കെ കുഞ്ഞാലിക്കുട്ടി. മുഖ്യമന്ത്രിയെ കേന്ദ്ര ഏജന്‍സി അറസ്റ്റ് ചെയ്യണമെന്ന അര്‍ത്ഥത്തിലായിരിക്കില്ല രാഹുല്‍ഗാന്ധി അങ്ങനെ പറഞ്ഞതെന്ന് എന്ന് കുഞ്ഞാലിക്കുട്ടി വ്യക്തമാക്കി. അന്വേഷണ ഏജന്‍സികളെ ദുരുപയോഗം ചെയ്യുന്നു എന്ന നിലപാടില്‍ മാറ്റമില്ല. രാഹുല്‍ ഗാന്ധിയുടെ പ്രസംഗത്തെ വ്യാഖ്യാനിക്കാന്‍ താനാളല്ലെന്നും അദ്ദേഹം പറഞ്ഞു.
കേരളത്തില്‍ യുഡിഎഫിന് നല്ല സാധ്യതയുണ്ട്. എല്ലാ മണ്ഡലങ്ങളിലും വലിയ ആവേശമാണ്. 20 ല്‍ 20 സീറ്റും യുഡിഎഫ് ജയിക്കും. ജനങ്ങള്‍ക്ക് ഭരണമാറ്റം എന്ന പ്രതീക്ഷയുണ്ട്. ബി ജെ പി മുന്നണിുടെ സാധ്യത അനുദിനം കുറയുകയാണ്. രാജ്യത്ത് ഇന്ത്യ മുന്നണിയുടെ മുന്നേറ്റമാണ് നടക്കുന്നത്. കേരളത്തിലെ തമിഴ്‌നാട്ടിലും നല്ല വിജയം ഉണ്ടാകും. കഴിഞ്ഞ തവണത്തേക്കാള്‍ ഭൂരിപക്ഷം കുറയുമെന്ന ആശങ്കയിലാണ് പ്രധാനമന്ത്രി ഇടയ്ക്കിടെ കേരളത്തില്‍ വരുന്നതെന്നും അദ്ദേഹം പറഞ്ഞു.
കള്ളവോട്ട് കൊണ്ടൊന്നും ഇത്തവണ സി പി എം രക്ഷപ്പെടാന്‍ പോകുന്നില്ല. കഴിഞ്ഞകാലങ്ങളില്‍ ഇവിടെ കള്ള വോട്ട് നടന്നിരുന്നു. അതിനെതിരെ യു ഡി എഫ് പ്രവര്‍ത്തകര്‍ ഇത്തവണ ബുദ്ധിപരമായി നീങ്ങുന്നുണ്ടെന്നും അദ്ദേഹം പറഞ്ഞു.