റാമല്ല: ഫലസ്തീൻ രാഷ്ട്രത്തിന്റെ ഏകപക്ഷീയമായ അംഗീകാരം വെസ്റ്റ് ബാങ്കിന്റെ ചില ഭാഗങ്ങൾ കൂട്ടിച്ചേർക്കുന്നതുൾപ്പെടെ ഏകപക്ഷീയമായ നടപടികളിലേക്ക് ഇസ്രായിലിനെ പ്രേരിപ്പിക്കുമെന്ന് ഇസ്രായിൽ മന്ത്രിമാർ യൂറോപ്യൻ രാജ്യങ്ങൾക്ക് മുന്നറിയിപ്പ് നൽകിയതായി ടൈംസ് ഓഫ് ഇസ്രായിൽ റിപ്പോർട്ട് ചെയ്തു.
വെസ്റ്റ് ബാങ്കിലെ ഏരിയ സി കൂട്ടിച്ചേർത്തും സെറ്റിൽമെന്റ് ഔട്ട്‌പോസ്റ്റുകൾ നിയമവിധേയമാക്കിയും ഫലസ്തീൻ രാഷ്ട്രത്തിന്റെ അംഗീകാരത്തോട് പ്രതികരിക്കാൻ ഇസ്രായിലിന് കഴിയുമെന്ന് ഇസ്രായിൽ സ്ട്രാറ്റജികാര്യ മന്ത്രി റോൺ ഡെർമർ ഫ്രഞ്ച് വിദേശകാര്യ മന്ത്രി ജീൻനോയൽ ബാരറ്റിനും ബ്രിട്ടീഷ് വിദേശ മന്ത്രി ഡേവിഡ് ലാമിക്കും നേരിട്ട് മുന്നറിയിപ്പ് നൽകിയതായി വിദേശ നയതന്ത്രജ്ഞനെ ഉദ്ധരിച്ച് ഇസ്രായിലിലെ ഹാരെറ്റ്‌സ് പത്രവും റിപ്പോർട്ട് ചെയ്തു.
വിദേശകാര്യ മന്ത്രി ഗിഡിയോൻ സാഅർ ബ്രിട്ടൻ, ഫ്രാൻസ്, മറ്റ് രാജ്യങ്ങൾ എന്നിവിടങ്ങളിലെ വിദേശ മന്ത്രിമാർക്ക് സമാനമായ സന്ദേശം നൽകിയതായി ഇസ്രായിൽ പത്രമായ ഇസ്രായിൽ ഹയോം റിപ്പോർട്ട് ചെയ്തു. ഇസ്രായിലിനെതിരായ ഏതൊരു നടപടിക്കും പകരമായി വെസ്റ്റ് ബാങ്കിലെ ജൂതകുടിയേറ്റ കോളനികളിലും ജോർദാൻ താഴ്‌വരയുടെ ചില ഭാഗങ്ങളിലും പരമാധികാരം വ്യാപിപ്പിക്കുന്നത് പോലുള്ള നടപടികൾ സ്വീകരിക്കുമെന്ന് ഗിഡിയോൻ സാഅർ മുന്നറിയിപ്പ് നൽകി. ഇസ്രായിലിനെതിരെ സ്വീകരിക്കുന്ന ഏതൊരു ഏകപക്ഷീയമായ നടപടിയെയും ഇസ്രായിൽ ഏകപക്ഷീയമായ നടപടികളിലൂടെ നേരിടുമെന്ന് വിദേശ മന്ത്രി പറഞ്ഞു.
വൈകാതെ ഫലസ്തീൻ രാഷ്ട്രത്തെ അംഗീകരിക്കുമെന്ന് കൂടുതൽ യൂറോപ്യൻ രാജ്യങ്ങൾ സൂചിപ്പിച്ചിട്ടുണ്ട്. കഴിഞ്ഞ വർഷം ഫലസ്തീൻ രാഷ്ട്രത്തെ അംഗീകരിച്ച സ്‌പെയിൻ പോലുള്ള രാജ്യങ്ങൾ, അങ്ങനെ ചെയ്യുന്ന രാജ്യങ്ങൾക്ക് പിന്തുണ പ്രഖ്യാപിക്കുമെന്ന് പ്രതീക്ഷിക്കുന്നു.