കൊച്ചി – സി പി എം നേതാവ് ഇ.പി.ജയരാജനെ വെടിവെച്ച് കൊല്ലാന് ശ്രമിച്ചെന്ന കേസില് കെ പി സി സി പ്രസിഡന്റ് കെ സുധാകരനെ ഹൈക്കോടതി കുറ്റവിമുക്തനാക്കി. കുറ്റപത്രത്തില്നിന്ന് ഒഴിവാക്കണമെന്ന കെ സുധാകരന്റെ ഹര്ജി അനുവദിച്ചുകൊണ്ടാണ് പ്രതിപട്ടികയില് നിന്ന് സുധാകരനെ ഒഴിവാക്കികൊണ്ട് ഹൈക്കോടതി ഉത്തരവിറക്കിയത്. കേസില് ഗൂഢാലോചന കുറ്റമാണ് സുധാകരനെതിരെ ചുമത്തിയിരുന്നത്. കേസില് ഒന്നും രണ്ടും പ്രതികളായ പേട്ട ദിനേശന്, വിക്രംചാലില് ശശി എന്നിവരെ ആദ്യം ആന്ധ്രയിലെ വിചാരണ കോടതി ശിക്ഷിച്ചെങ്കിലും മേല്ക്കോടതി പിന്നീട് കുറ്റവിമുക്തരാക്കിയിരുന്നു. ഇക്കാര്യം ചൂണ്ടിക്കാട്ടിയാണ് തന്നെയും കുറ്റമുക്തമാക്കണമെന്ന് ആവശ്യപ്പെട്ട് കെ.സുധാകരന് തിരുവനന്തപുരം അഡീഷണല് സെഷന്സ് കോടതിയെ സമീപിച്ചത്. എന്നാല്, സുധാകരനെതിരെ ഗൂഡാലോചനക്ക് തെളിവുകളുണ്ടെന്ന് ചൂണ്ടിക്കാട്ടി ഹര്ജി വിചാരണ കോടതി തള്ളിയിരുന്നു. തുടര്ന്ന് വിചാരണയില് നിന്ന് ഒഴിവാക്കണമെന്ന് ആവശ്യപ്പെട്ട് ഹൈക്കോടതിയെ സമീപിക്കുകയായിരുന്നു.
ഏറ്റവും പുതിയ വാർത്തകൾ വാട്സാപ്പിൽ ലഭിക്കാൻ Join Our WhatsApp Group