ജിദ്ദ: ഹിസ്റ്റോറിക് ജിദ്ദ ഏരിയയിലെ പൈതൃക ഹോട്ടലുകൾ അറ്റകുറ്റപ്പണികൾക്കായി താൽക്കാലികമായി അടച്ചതായി സാംസ്‌കാരിക മന്ത്രാലയം അറിയിച്ചു. സന്ദർശകർക്ക് സംയോജിത സാംസ്‌കാരിക, ടൂറിസം അനുഭവം നൽകുന്നതിൽ ഉയർന്ന നിലവാര നിലവാരം നിലനിർത്തുക എന്ന ലക്ഷ്യത്തോടെയുള്ള സീസണൽ മെയിന്റനൻസ് പ്ലാനിന്റെ ഭാഗമായാണ് ഹോട്ടലുകൾ അടച്ചത്.
ഹിസ്റ്റോറിക് ജിദ്ദ ഏരിയയിലെ 34 പൈതൃക കെട്ടിടങ്ങൾ അറ്റകുറ്റപ്പണികൾ നടത്തി പുനരുദ്ധരിക്കാനും അവയുടെ വാസ്തുവിദ്യാ സ്വഭാവവും യഥാർഥ ഘടകങ്ങളും സംരക്ഷിക്കുന്ന ഹോട്ടലുകളാക്കി മാറ്റാനുമുള്ള പദ്ധതിയിലൂടെ പൈതൃക കെട്ടിടങ്ങൾ പുനരുജ്ജീവിപ്പിക്കാനും നിലനിർത്താനുമുള്ള മന്ത്രാലയത്തിന്റെ ശ്രമങ്ങളുടെ ഭാഗമായാണ് ഇവ താൽക്കാലികമായി അടച്ചുപൂട്ടിയിരിക്കുന്നത്.
പ്രദേശത്തിന്റെ സാംസ്‌കാരിക സ്വത്വം പ്രതിഫലിപ്പിക്കാനായി ഓരോ കെട്ടിടത്തിന്റെയും സവിശേഷമായ വാസ്തുവിദ്യാ സവിശേഷതകൾ ഉയർത്തിക്കാണിക്കുന്ന നിലക്ക് യുനെസ്‌കോ മാർഗനിർദേശങ്ങളും ഉയർന്ന അന്താരാഷ്ട്ര മാനദണ്ഡങ്ങളും അനുസരിച്ച് അറ്റകുറ്റപ്പണികൾ നടത്തി പുനരുദ്ധരിച്ച് ബെയ്ത്ത് ജോഖ്ദാർ, ബെയ്ത്ത് അൽറയ്യസ്, ബെയ്ത്ത് കദ്‌വാൻ എന്നീ മൂന്ന് ഹെറിറ്റേജ് ഹോട്ടലുകാണ് ആദ്യ ഘട്ടത്തിൽ പ്രവർത്തപ്പിക്കുന്നത്.
ഹിസ്റ്റോറിക് ജിദ്ദയെ പ്രതിനിധീകരിക്കുന്ന സ്ഥാപനങ്ങളായി പൈതൃക ഹോട്ടലുകളുടെ തുടർച്ച ഉറപ്പാക്കുക, കെട്ടിടങ്ങളുടെ സമഗ്രതയും സന്ദർശകരുടെ പ്രതീക്ഷകൾ നിറവേറ്റാനായി അവയുടെ പ്രവർത്തന കാര്യക്ഷമതയും വർധിപ്പിക്കുക എന്നിവയാണ് അറ്റകുറ്റപ്പണികളിലൂടെ ലക്ഷ്യമിടുന്നത്. അറ്റകുറ്റപ്പണികൾ പൂർത്തിയാകുന്നതോടെ ഈ ഹോട്ടലുകളിൽ ആതിഥേയ സേവനങ്ങൾ പുനരാരംഭിക്കും.