തിരുവനന്തപുരം– സംസ്ഥാനത്ത് കനത്ത മഴ തുടരുന്നതിനാല്‍ വ്യാപക നാശനഷ്ടങ്ങള്‍ റിപ്പോര്‍ട്ട് ചെയ്തു. കോഴിക്കോട് ഒടുംബ്ര കള്ളിക്കുന്നില്‍ വീടിന്റെ സംക്ഷണ ഭിത്തി തകര്‍ന്നു. കോയങ്ങോറത്ത് അഷ്‌റഫിന്റെ വീടിന്റെ സംരക്ഷണ ഭിത്തിയാണ് തകര്‍ന്നത്. കണ്ണൂര്‍ ജില്ലയിലെ അഴീക്കോട് യുവാവിനെ കുളത്തില്‍ കാണാതായി. മാട്ടൂല്‍ സ്വദേശി ഇസ്മായിലിനെയാണ് കാണാതായത്. മീന്‍കുന്ന് ആനി വയല്‍ കുളത്തിലാണ് അപകടം. കൂട്ടുകാര്‍ക്കൊപ്പം കളിക്കുന്നതിനിടെയാണ് അപകടം. ജില്ലയിലെ തന്നെ ബാവലി പുഴയുടെ തടയണ പൊട്ടി. കൊട്ടിയൂര്‍ ക്ഷേത്രത്തിന് സമീപത്തെ തടയണയാണ് പൊട്ടിയത്. ഉത്സവത്തിനെത്തുന്നവര്‍ കുളിക്കുന്ന ഭാഗത്ത് സ്ഥാപിച്ചതായിരുന്നിത്.
കോട്ടയം ചുങ്കം മെഡിക്കല്‍ കോളജ് റോഡില്‍ മരം വീണ് ഗതാഗതം തടസ്സപ്പെട്ടു. ചുങ്കം പാലത്തിന് സമീപമാണ് കൂറ്റന്‍ മരം കടപുഴകി വീണത്. അപകടത്തില്‍ ആളപായമൊന്നുമില്ല. അഗ്നിരക്ഷാസേന സ്ഥലത്തെത്തി മരം മുറിച്ചു നീക്കി. തിരുവന്തപുരം ചാല യു.പി സ്‌കൂളിന്റെ മതില്‍ ഇടിഞ്ഞു വീണു. സ്മാര്‍ട്ട് റോഡ് നിര്‍മാണവുമായ ബന്ധപ്പെട്ട് പണി നടക്കുന്നതിനിടെ കഴിഞ്ഞ ദിവസമാണ് മതില്‍ ഇടിഞ്ഞു വീണത്.
വടക്കന്‍ കേരളത്തില്‍ അതിതീവ്ര മഴ മുന്നറിയിപ്പ്. മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളില്‍ റെഡ് അലര്‍ട്ട് പ്രഖ്യാപിച്ചിട്ടുണ്ട്, മലയോര മേഖലയില്‍ ഇന്നലെ തുടങ്ങിയ ഇന്നും തുടരുകയാണ്. തിങ്കളാഴ്ച കാസര്‍കോട് ഒഴികെ ബാക്കി മൂന്ന് ജില്ലകളിലും ചൊവ്വാഴ്ച മലപ്പുറം, കോഴിക്കോട് ജില്ലകളിലും റെഡ് അലര്‍ട്ട് പ്രഖ്യാപിച്ചിട്ടുണ്ട്. സംസ്ഥാനത്ത് ഗതാഗതം കാര്യക്ഷമമായി നിയന്ത്രിക്കണമെന്നും അത്യാവശ്യമല്ലാത്ത യാത്രകള്‍ ഒഴിവാക്കി ആളുകള്‍ സുരക്ഷിത മേഖലകളില്‍ തുടരാനും നിര്‍ദേശമുണ്ട്.