കോഴിക്കോട്: പരസ്പരമുള്ള കരുണയും ഗുണകാംക്ഷയുമാണ് മനുഷ്യ വംശത്തെ ഭൂമിയിൽ നിലനിർത്തുന്ന പ്രധാനപ്പെട്ട ഘടകങ്ങളെന്നും അവക്ക് സംഭവിക്കുന്ന ഏതൊരു ഇടർച്ചയും മനുഷ്യാസ്ഥിത്വത്തെ ഇല്ലാതാക്കുമെന്നും പ്രമുഖ പണ്ഡിതനും ദാറുൽ മുസ്തഫ യൂണിവേഴ്സിറ്റി ഡയറക്ടറുമായ ശൈഖ് ഹബീബ് ഉമർ അഭിപ്രായപ്പെട്ടു. കാലിക്കറ്റ് ഫ്രൈഡേ ക്ലബ്ബിന്റെ ആഭിമുഖ്യത്തിൽ ഹൈലൈറ്റ് ബിസിനസ് പാർക്കിൽ സംഘടിപ്പിച്ച രിഹ് ല യൂത്ത് കണക്റ്റിൽ സംസാരിക്കുകയായിരുന്നു അദ്ദേഹം. ഗുണകാംക്ഷയെ വീണ്ടെടുക്കുന്നതിലൂടെ മാത്രമേ മനുഷ്യ സമൂഹത്തിന്റെ പുനരുജ്ജീവനം സാധ്യമാവുകയുള്ളൂ. അതിനു സഹായിക്കുന്ന തരത്തിലുള്ള സാമൂഹികാന്തരീക്ഷം നിലനിർത്താൻ വിശ്വാസികൾ പരിശ്രമിക്കണം. അദ്ദേഹം പറഞ്ഞു.
മഅദിൻ അക്കാദമി ചെയർമാൻ സയ്യിദ് ഇബ് റാഹീമുൽ ഖലീൽ അൽ ബുഖാരി, മർകസ് നോളജ് സിറ്റി മാനേജിങ് ഡയറക്ടർ ഡോ. അബ്ദുൽ ഹക്കീം അസ് ഹരി, ബഷീർ അബ്ദുറഹിമാൻ, കെ എ നുഐമാൻ, ജവാദ് മുസ്തഫവി, ഹാമിദ് അബൂബക്കർ, ജാഫർ സ്വാദിഖ്, ഷഫീഖ് പേരോട് എന്നിവർ സംസാരിച്ചു. വിവിധ മേഖലകളിൽ പ്രവർത്തിക്കുന്ന മുന്നൂറോളം സംരംഭകരും പ്രൊഫഷണലുകളും രാഷ്ട്രീയ സാമൂഹ്യ മേഖലകളിലെ യുവ നേതാക്കളും പങ്കെടുത്തു.