പാലക്കാട്: തൃത്താല സബ്ജില്ലാ കലോത്സവത്തിനിടെ കൂറ്റനാട് പ്ലസ് ടു വിദ്യാർത്ഥികൾ തമ്മിലുണ്ടായ സംഘർഷത്തിൽ ഒരു വിദ്യാർത്ഥിക്ക് കുത്തേറ്റു. കുമരനല്ലൂർ ഗവ. ഹയർ സെക്കൻഡറി സ്‌കൂൾ, മേഴത്തൂർ ഗവ. ഹയർ സെക്കൻഡറി സ്‌കൂൾ എന്നിവിടങ്ങളിലെ പ്ലസ് ടു വിദ്യാർത്ഥികൾ തമ്മിലാണ് സംഘർഷമുണ്ടായത്.
മേഴത്തൂർ സ്‌കൂളിലെ പ്ലസ് ടു വിദ്യാർത്ഥി അബ്ദുൽ ബാസിത്തിനാണ് കുത്തേറ്റത്. വയറിന് കുത്തേറ്റ ബാസിത്തിനെ കുന്നംകുളത്തെ സ്വകാര്യ ആശുപത്രിയിൽ പ്രവേശിപ്പിച്ചു. സംഭവത്തിൽ കുമരനെല്ലൂർ ഹയർ സെക്കൻഡറി സ്‌കൂളിലെ മൂന്ന് പ്ലസ് വിദ്യാർത്ഥികളെ കസ്റ്റഡിയിലെടുത്തതായി ചാലിശ്ശേരി പോലീസ് പറഞ്ഞു.
നാലു ദിവസമായി നടക്കുന്ന തൃത്താല സബ് ജില്ലാ കലോത്സവത്തിനിടെയാണ് ഇരു സ്‌കൂളുകളിലെയും പ്ലസ് ടു വിദ്യാർത്ഥികൾ തമ്മിൽ ആദ്യം സംഘർഷമുണ്ടായത്. പിന്നീട് പരസ്പരം പക വീട്ടുമെന്നുള്ള ഇൻസ്റ്റഗ്രാം റീലുകളും ഇരുകൂട്ടരും പങ്കുവച്ചു. ശേഷം രക്ഷിതാക്കളും അധ്യാപകരും ഇടപെട്ടതിന് പിന്നാലെ റീലുകൾ ഇവർ പിൻവലിക്കുകയായിരുന്നു.
തുടർന്ന് ഒത്തുതീർപ്പിനെന്ന പേരിൽ ശനിയാഴ്ച വൈകീട്ട് കൂറ്റനാട് മല റോഡിൽ ഇരു വിഭാഗവും എത്തുകയായിരുന്നു. അവിടെ വെച്ചുള്ള വാക്കു തർക്കത്തിലാണ് വിദ്യാർത്ഥിയെ കുത്തി പരുക്കേൽപ്പിച്ചതെന്ന് പോലീസ് പറഞ്ഞു.