വടകര– വീട്ടില്‍ സുരക്ഷിതമല്ലെന്ന് കരുതി കടയില്‍ സൂക്ഷിച്ച 24 പവന്റെ സ്വര്‍ണ്ണം കവര്‍ന്ന ജീവനക്കാരനെ പൊലീസ് അറസ്റ്റ് ചെയ്തു. ചോറോട്, കുരിയാടി സ്വദേശി സുനില്‍ (35) ആണ് വടകര പൊലീസിന്റെ അറസ്റ്റിലായത്.
വടകര, മാര്‍ക്കറ്റ് റോഡിലെ ഗിഫ്റ്റ് ഹൗസ് സ്റ്റേഷനറി ബുക് സ്റ്റാളിലാണ് മോഷണം നടന്നത്. കടയുടമ ഗീത രാജേന്ദ്രന്‍ വിവാഹ ആവശ്യത്തിനായി ലോക്കറില്‍ നിന്നെടുത്ത സ്വര്‍ണ്ണം വീണ്ടും ലോക്കറില്‍ വെക്കാനായിരുന്നു തീരുമാനം. ഇതുപ്രകാരം എടുത്ത സ്വര്‍ണ്ണം ലോക്കറില്‍ വെക്കുന്നതിന് മുമ്പ് വീട്ടില്‍ വെക്കുന്നതിനെക്കാള്‍ സുരക്ഷിതം സ്വന്തം കടയിലാണെന്ന ധാരണയിലായിരുന്നു സൂക്ഷിച്ചത്. സംഭവത്തില്‍ കടയുടമ ഗീതാ രാജേന്ദ്രന്‍ പൊലീസില്‍ പരാതി നല്‍കിയിരുന്നു.
35 വര്‍ഷത്തോളമായി കടയില്‍ ജോലി ചെയ്യുന്ന സുനിലിന് സ്വര്‍ണ്ണം സൂക്ഷിച്ചത് അറിയാമായിരുന്നു. തിങ്കളാഴ്ചയാണ് സ്വര്‍ണ്ണം നഷ്ടപ്പെട്ടത് കടയുടമക്ക് മനസ്സിലായത്. ഇതോടെ ജീവനക്കാരനെ ചോദ്യം ചെയ്തപ്പോള്‍ മോഷ്ടിച്ചതായി ഉടമയോട് സമ്മതിക്കുകയും, സ്വര്‍ണ്ണം വില്‍പ്പന നടത്തിയെന്നും 2 മാസത്തിനകം തിരിച്ചുനല്‍കാമെന്ന് അറിയിക്കുകയും ചെയ്തു.
ഇന്നലെ പതിവുപോലെ കടയിലെത്തിയ ജീവനക്കാരനെ പരാതിയുടെ അടിസ്ഥാനത്തില്‍ പൊലീസ് കസ്റ്റഡിയിലെടുക്കുകയായിരുന്നു. വടകര ജുഡീഷ്യല്‍ ഫസ്റ്റ് ക്ലാസ്സ് മജിസ്‌ട്രേറ്റ് കോടതില്‍ ഹാജരാക്കി റിമാന്‍ഡ് ചെയ്യുകയായിരുന്നു.