തിരുവനന്തപുരം: ഛത്തീസ്ഗഢിൽ മതപരിവർത്തന ആരോപണത്തെ തുടർന്ന് കന്യാസ്ത്രീകളെ അറസ്റ്റ് ചെയ്ത സംഭവത്തിൽ പ്രതിഷേധിച്ച് ക്രൈസ്തവ സഭകൾ രാജ്ഭവനിലേക്ക് റാലി നടത്തി. വൈദികർ, കന്യാസ്ത്രീകൾ, വിശ്വാസികൾ എന്നിവർ കറുത്ത റിബൺ കൊണ്ട് വായ മൂടിക്കെട്ടി റാലിയിൽ പങ്കെടുത്തു. തിരുവനന്തപുരം പാളയം രക്തസാക്ഷി മണ്ഡപത്തിൽ നിന്ന് ആരംഭിച്ച റാലി രാജ്ഭവന് മുന്നിൽ പൊതുയോഗത്തിൽ സമാപിക്കും. പൊതുയോഗത്തിൽ ബിഷപ്പുമാർ പങ്കെടുത്തു.
വിവിധ ക്രൈസ്തവ സഭകളിൽ നിന്നുള്ളവർ റാലിയിൽ അണിനിരന്നു. മതമേലധ്യക്ഷന്മാർ റാലിക്ക് നേതൃത്വം നൽകി. “ഈ വിഷയത്തിൽ ഞങ്ങളുടെ നിലപാട് വ്യക്തമാണ്. ഇനി നീതി ലഭിക്കാതെ ബിജെപിയുമായി ഒരു ചങ്ങാത്തവും വേണ്ട,” എന്ന് കെസിബിസി അധ്യക്ഷൻ ബസേലിയോസ് ക്ളീമീസ് കാതോലിക്കാ ബാവ പറഞ്ഞു. കന്യാസ്ത്രീകളുടെ അറസ്റ്റ് ക്രൈസ്തവ സമൂഹത്തിന് ഒരു മാനദണ്ഡമായിരിക്കുമെന്നും അദ്ദേഹം കൂട്ടിച്ചേർത്തു.