(മഞ്ചേരി)മലപ്പുറം: ആമയൂരിൽ 18-കാരി ജീവനൊടുക്കിയതിന് പിന്നാലെ ആത്മഹത്യയ്ക്ക് ശ്രമിച്ച അയൽവാസിയായ ആൺ സുഹൃത്തിനെയും തൂങ്ങിമരിച്ച നിലയിൽ കണ്ടെത്തി. ബ്യൂട്ടീഷൻ കോഴ്‌സ് വിദ്യാർത്ഥിയായ കാരക്കുന്ന് കൈക്കോട്ടു പറമ്പിൽ സജീറിനെ(19)യാണ് മരിച്ച നിലയിൽ കണ്ടെത്തിയത്.
പെൺകുട്ടി ജീവനൊടുക്കിയതിന് പിന്നാലെ കൈയിലെ ഞരമ്പ് മുറിച്ച് ആത്മഹത്യയ്ക്ക് ശ്രമിച്ച യുവാവ് മഞ്ചേരി മെഡിക്കൽ കോളജിൽ ചികിത്സയിലായിരുന്നു. ഇന്നലെ ആശുപത്രിയിൽ നിന്നും ആരും അറിയാതെ പുറത്തിറങ്ങുകയായിരുന്നു. എടവണ്ണ പുകമണ്ണിൽ നിന്നാണ് യുവാവിന്റെ മൃതദേഹം കണ്ടെത്തിയതെന്ന് പോലീസ് പറഞ്ഞു.
ഈ മാസം മൂന്നിനാണ് ആമയൂർ റോഡ് പുതിയത്ത് വീട്ടിൽ ഷൈമ സിനിവർ വീട്ടിൽ തൂങ്ങി മരിച്ചത്. പ്ലസ്ടു കഴിഞ്ഞ് പി.എസ്.സി പരീക്ഷ പരിശീലനത്തിന് പോവുകയായിരുന്ന ഷൈമയുടെ നിക്കാഹ് കഴിഞ്ഞ് മൂന്നാം നാളായിരുന്നു മരണം. വിവാഹത്തിലെ താൽപ്പര്യക്കുറവാണ് മരണത്തിന് വഴിവെച്ചതെന്നാണ് പോലീസ് റിപോർട്ട്. ഷൈമയുടെ മരണവിവരം കേട്ടയുടനെയാണ് സുഹൃത്തും കടുംകൈക്ക് ശ്രമിച്ചതെന്ന് പോലീസ് വ്യക്തമാക്കി. മൃതദേഹം പോസ്റ്റമോർട്ടത്തിനുശേഷം ബന്ധുക്കൾക്ക് വിട്ടുനൽകുമെന്ന് പോലീസ് പറഞ്ഞു.