കണ്ണൂര്‍: പിതാവ് ഉള്‍പ്പെടെ 12 പേര്‍ പതിനഞ്ചുകാരിയെ പീഡിപ്പിച്ച തളിപ്പറമ്പ് ആയിപ്പുഴ പീഡനക്കേസിലെ രണ്ടാം പ്രതിക്ക് 15 വര്‍ഷം തടവും ഒന്നര ലക്ഷം രൂപയുടെ പിഴയും. മങ്കടന്‍ പുതിയപാറയില്‍ സക്കറിയയേയാണ് തളിപ്പറമ്പ് പോക്‌സോ കോടി ശിക്ഷിച്ചത്. ഇയാള്‍ വിദേശത്തേക്ക് കടന്നുകളഞ്ഞുവെങ്കിലും പിന്നീട് പൊലീസ് പിടികൂടുകയായിരുന്നു.
വിദേശത്ത് ജോലി നോക്കിയിരുന്ന ഇയാള്‍ 2024 സപ്തംബറില്‍ നാട്ടിലെത്തിയപ്പോഴാണ് പൊലീസിന്റെ വലയിലായത്.
2008 ഏപ്രിലില്‍ പറശ്ശിനിക്കടവിലുള്ള റിസോര്‍ട്ടില്‍ വെച്ചാണ് പ്രതിയായ സക്കറിയ പിതാവിന്റെ സഹായത്തോടെ പെണ്‍കുട്ടിയെ പീഡിപ്പിച്ചതെന്നതാണ് കേസ്. മറ്റുപ്രതികളെല്ലാം നേരത്തെ ശിക്ഷിക്കപ്പെട്ടിരുന്നു. ശിക്ഷയില്‍ കഴിയവെ പിതാവ് കണ്ണൂര്‍ സെന്‍ട്രല്‍ ജയിലില്‍ തൂങ്ങി മരിച്ചു. പത്താം ക്ലാസ്സില്‍ പഠിക്കുമ്പോള്‍ പെണ്‍കുട്ടി മാതാവിനോട് വിവരം പറഞ്ഞതിനെത്തുടര്‍ന്നാണ് അവര്‍ പൊലീസില്‍ പരാതി നല്‍കിയത്. പ്രായപൂര്‍ത്തിയാകാത്ത മകളെ സ്വന്തം പിതാവ് തന്നെ പന്ത്രണ്ടു വയസ്സുമുതല്‍ ലൈംഗികമായി പീഡിപ്പിക്കുകയും മറ്റുള്ളവര്‍ക്കായി കാഴ്ചവെക്കുകയും ചെയ്തുവെന്നതായിരുന്നു മാതാവിന്റെ പരാതി.