ഭുവനേശ്വര്‍– ഒഡിഷയിലെ മയൂര്‍ഭഞ്ച് ജില്ലയില്‍ യുവതിയെ നാല് പേര്‍ ചേര്‍ന്ന് ബലാത്സംഗം ചെയ്തതായി പരാതി. പ്രതികള്‍ ഒളിവില്‍. 31കാരിയായ യുവതിയുടെ വീട്ടില്‍ ഭര്‍ത്താവും മറ്റ് കുടുംബാംഗങ്ങളൊന്നും ഇല്ലാതിരുന്ന സമയത്താണ് പരിചയക്കാരായ പ്രതികള്‍ അതിക്രമിച്ചു കയറിയത്. ഇരയെ ബലമായി മറ്റൊരു പ്രദേശത്തേക്ക് കൊണ്ടു പോയി ബലത്സംഗം ചെയ്യുകയായിരുന്നു. ഇക്കാര്യം പുറത്ത് പറഞ്ഞാല്‍ കൊന്നുകളയുമെന്ന് പ്രതികള്‍ ഭീഷണിപ്പെടുത്തുകയും ചെയ്തു. ആശുപത്രിയില്‍ പ്രവേശിപ്പിച്ച അതിജീവിതയുടെ ആരോഗ്യ നില ഇപ്പോള്‍ തൃപ്തികരമാണ്.
നാല് പ്രതികളുടെയും പേരുകള്‍ ഇര വെളിപ്പെടുത്തിയിട്ടുണ്ടെന്നും എല്ലാവരും ഒളിവിലാണെന്നും ബാരിപാഡ-സദര്‍ പോലീസ് സ്‌റ്റേഷന്‍ ഇന്‍സ്‌പെക്ടര്‍ ആദിത്യ പ്രസാദ് ജെന പറഞ്ഞു. കേസ് അന്യേഷണത്തിനായി പ്രത്യേക അന്യേഷണ സംഘത്തെ രൂപീകരിച്ചിട്ടുണ്ടെന്നും അദ്ദേഹം കൂട്ടിച്ചേര്‍ത്തു. ജൂണ്‍ 15 ഞായറാഴ്ച കോളജ് വിദ്യാര്‍ഥിയെ ഗോപാല്‍പൂര്‍ ബീച്ചില്‍ ഒരു കോളജ് വിദ്യാര്‍ഥിനിയെ കൂട്ടബലാത്സംഗം ചെയ്തതായി റിപ്പോര്‍ട്ട് വന്നിരുന്നു. സംഭവത്തില്‍ നാല് പ്രായപൂര്‍ത്തിയാകാത്തവര്‍ ഉള്‍പ്പെടെ 10 പ്രതികളെ പോലീസ് അറസ്റ്റ് ചെയ്തു.
കിയോഞ്ജര്‍ ജില്ലയില്‍ ചൊവ്വാഴ്ച പതിനേഴ് വയസ് പ്രായമുള്ള പെണ്‍കുട്ടിയെ കൂട്ട ബലാത്സംഗം ചെയ്ത് കൊന്ന് മരത്തില്‍ കെട്ടിത്തൂക്കിയതായും റിപ്പോര്‍ട്ട് ചെയ്തിട്ടുണ്ട്. തിങ്കളാഴ്ച രാത്രി വീട്ടില്‍ നിന്ന് പുറത്തേക്കിറങ്ങിയ പെണ്‍കുട്ടിയെ പിന്നീട് കാണാതാവുയായിരുന്നു. സംഭവത്തില്‍ രണ്ടാളുകളെ അറസ്റ്റ് ചെയ്തതായി പണ്ടാപട പോലീസ്‌റ്റേഷന്‍ അധികാരി ലക്ഷിമികാന്ത് പ്രധാന്‍ പറഞ്ഞു.