ന്യൂഡൽഹി– ഇന്ത്യൻ സൈനിക ഉദ്യോഗസ്ഥയായ കർണൽ സോഫിയ ഖുറൈഷിക്കെതിരായ മോശമായ പരാമർശം നടത്തിയ കേസ് സംബന്ധിച്ച് മാപ്പ് അപേക്ഷിച്ച മധ്യപ്രദേശ് കാബിനറ്റ് മന്ത്രി കുന്വർ വിജയ് ഷായുടെ അപേക്ഷ സുപ്രീം കോടതി തളളിച്ചു. പരാമർശം അഭിപ്രായമല്ല, അശ്രീലവും ഉത്തരവാദിത്തമില്ലാത്തതുമായാണ് എന്ന് സുപ്രിം കോടതി വിമർശിച്ചു.
സൈനിക ഓഫീസറെയും സൈന്യത്തെയും അപമാനിക്കുന്ന രീതിയിൽ നടത്തിയ പരാമർശം ”ഭീകരരുടെ സഹോദരി” എന്നായിരുന്നു. ഇതു പൊതുജനങ്ങളിൽ നിന്നും രാഷ്ട്രീയ പാർട്ടികളിൽ നിന്നും വ്യാപക പ്രതിഷേധം ഉയർത്തിയിരുന്നു.
പരാമർശം സംബന്ധിച്ച് കുന്വർ വിജയ് ഷാ മാപ്പ് ആവശ്യപ്പെട്ടെങ്കിലും അത് പര്യാപ്തമല്ലെന്ന് കോടതി വ്യക്തമാക്കി. സംഭവം ഗൗരവമുള്ളതാണെന്നും, ഇതിൽ സത്യാവസ്ഥ അറിയേണ്ടതാണെന്നും വ്യക്തമാക്കി, കേസിൽ പ്രത്യേക അന്വേഷണം നടത്താൻ എസ്.ഐ.ടി (സ്‌പെഷ്യൽ ഇൻവസ്റ്റിഗേഷൻ ടീം) രൂപീകരിക്കാനും കോടതി ഉത്തരവിട്ടു.
സൈനിക ഉദ്യോഗസ്ഥർക്കെതിരെയുള്ള അപമാനകരമായ പരാമർശങ്ങൾ അനുവദിക്കാനാകില്ലെന്നും, പൊതുസ്ഥാനങ്ങളിൽ ഇരിക്കുന്നവർ പരമാവധി ജാഗ്രത പുലർത്തേണ്ടതാണെന്നും കോടതി ചൂണ്ടിക്കാട്ടി.
ഇതേ തുടർന്ന് ബിജെപി ദേശീയ അധ്യക്ഷൻ ജെ.പി നദ്ദ സംഭവത്തിൽ റിപ്പോർട്ട് തേടി മന്ത്രി വിജയ് ഷായെ വിളിപ്പിച്ചിരുന്നു. കോൺഗ്രസ് സംഭവത്തിൽ കടുത്ത നിലപാട് സ്വീകരിച്ച് ഷായുടെ രാജി ആവശ്യപ്പെട്ടതോടൊപ്പം എഫ്.ഐ.ആർ നൽകിയിട്ടുണ്ട്. നടപടി ഇല്ലെങ്കിൽ നിയമനടപടികൾ തുടരുമെന്ന് കോൺഗ്രസ് മുന്നറിയിപ്പും നൽകി.
സൈന്യത്തേയും അതിലെ ഉദ്യോഗസ്ഥരേയും മാന്യമായി സമീപിക്കേണ്ടത് ഓരോ രാഷ്ട്രീയ നേതാവിന്റെയും ബാധ്യതയാണെന്നും, നിയമവും നീതിയും ഉയർന്ന നിലയിൽ നിലനിർത്തേണ്ടത് രാജ്യത്തിന്റെ വിശ്വാസ്യതക്ക് അനിവാര്യമാണെന്നും കോടതി ഓർമിപ്പിച്ചു.