ഭുവനേശ്വര്– ഒഡിഷയിലെ ഗോപാല്പുര് ബീച്ചില് കോളജ് വിദ്യാര്ഥിയെ കൂട്ടബലാത്സംഗത്തിന് ഇരയാക്കിയ കേസില് മൂന്നുപേര് കൂടി പിടിയില്. പ്രായപൂര്ത്തിയാകാത്ത നാലുപേര് ഉള്പ്പെടെ കേസില് പത്ത് പേര് അറസ്റ്റില്. ചൊവ്വാഴ്ച വൈകുന്നേരമാണ് ഇവരുടെ അറസ്റ്റ് രേഖപ്പെടുത്തിയതെന്ന് പോലീസ് പറഞ്ഞു. അറസ്റ്റിലായ പത്തു പേരില് നാല് പ്രതികളെ ജുവനൈല് ജസ്റ്റിസിന് ബോര്ഡിന് കീഴില് ഹാജരാക്കുകയും ആറു പ്രതികളെ കോടതിയില് ഹാജരാക്കുകയും ചെയ്തു. പ്രായപൂര്ത്തിയാകാത്തവരെ വിചാരണസമയത്ത് മുതിര്ന്നവരായി കണക്കാക്കാന് പോലീസ് ജെ.ജെ.പി ഉദ്യോഗസ്ഥരോട് ആവശ്യപ്പെട്ടതായി ബെര്ഹാംപൂര് പോലീസ് സൂപ്രണ്ട് എം. ശരവണ വിവേക് പറഞ്ഞു. സുപ്രീംകോടതി വിധി പ്രകാരം ഗുരുതരമായ കുറ്റകൃത്യങ്ങളില് ഏര്പ്പെടുന്ന 16 വയസ്സിന് മുകളിലുള്ളവരെ മുതിര്ന്നവരായി വിചാരണ ചെയ്യാം. കേസില് അറസ്റ്റിലായ നാല് പ്രതികള് 17 വയസ്സിനു മുകളിലുള്ളവരാണ്. അതിനാലാണ് ജെ.ജെ.ബിക്ക് മുന്നില് ഇത്തരമൊരു ആവശ്യം ഉന്നയിച്ചതെന്ന് ശരവണ വിവേക് കൂട്ടിച്ചേര്ത്തു.
ജൂണ് 15 ഞായറാഴ്ച വൈകിട്ട് ആറുമണിയോടെയാണ് ആണ് സുഹൃത്തിനോടൊപ്പം യുവതി ബീച്ചിലെത്തിയത്. കൂട്ടമായെത്തിയ ഒരും സംഘം യുവാക്കള് ആണ് സുഹൃത്തിനെ മര്ദിച്ച് കെട്ടിയിട്ട ശേഷം ബീച്ചിന് അടുത്തുള്ള വീട്ടിലേക്ക് യുവതിയെ വലിച്ചിഴച്ച് കൊണ്ടു പോയി. മൂന്ന് പേര് യുവതിയ ക്രൂരമായി ബലാത്സംഗം ചെയ്യുകയും ബാക്കിയുള്ളവര് യുവാവിനെ മര്ദിക്കുകയും ചെയ്തതായി പോലീസ് പറഞ്ഞു. ബെംഗളൂരില് ജോലി ചെയ്യുന്ന 23കാരനാണ് പ്രധാന പ്രതി. ഇയാള് താമസിച്ചിരുന്നത് ബീച്ചിനടുത്ത് തന്നെയാണ്. പ്രതികള് യുവതിയുടെ സുഹൃത്തില് നിന്ന് പണം ആവശ്യപ്പെടുകയും യു.പി.ഐ ഇടപാട് നടത്തിയതിന്റെ തെളിവുകള് കിട്ടിയതായും പോലീസ് അറിയിച്ചു. അതിജീവിത നേരിട്ട് പോലീസ് സ്റ്റേഷനിലെത്തിയാണ് പരാതി നല്കിയത്. ഭാരതീയ ന്യായ സംഹിത സെക്ഷന് 70(1)കൂട്ടബലാത്സംഗം, 296(അശ്ലീല പ്രവര്ത്തികളും പാട്ടുകളും), 351(3)ഭീഷണിപ്പെടുത്തല്, 310(2) കൊള്ളയടിക്കല് എന്നീ വകുപ്പുകളാണ് ചുമത്തിയിരിക്കുന്നത്.
ഒഡിഷയിലെ പ്രധാന വിനോദ സഞ്ചാര കേന്ദ്രങ്ങളിലൊന്നായ ഗോപാല്പുര് ബീച്ചിലുണ്ടായ ക്രൂരകൃത്യത്തില് സംസ്ഥാനമാകെ നടുങ്ങിയിരിക്കുകയാണ്. ഒഡിഷ ഉപമുഖ്യമന്ത്രി പ്രവാതി പരിട ഭാവിയില് ഇത്തരം കുറ്റകൃത്യങ്ങള് ആവര്ത്തിക്കാതിരിക്കാന് വേണ്ട മുന്കരുതലുകല് എടുക്കണമെന്ന് നിര്ദേശം നല്കി. പ്രതിപക്ഷ നേതാവ് നവീന് പഠ്നായിക് സംഭവത്തില് സംസ്ഥാന സര്ക്കാറിനെ കുറ്റപ്പെടുത്തി. സര്ക്കാര് സ്ത്രീകള്ക്ക് നേരെയുണ്ടാകുന്ന അതിക്രമത്തില് കുറച്ചുകൂടി ജാഗ്രത പുലര്ത്തണം. വിനോദസഞ്ചാര കേന്ദ്രങ്ങളില് സ്ത്രീകളുടെ സുരക്ഷ ചോദ്യചിഹ്നമായിരിക്കുകയാണെന്ന് അദ്ദേഹം പറഞ്ഞു. സംഭവത്തില് യുവതിയുടെ വൈദ്യപരിശോധനയും ആണ് സുഹൃത്തിന്റെ മൊഴിയും പോലീസ് രേഖപ്പെടുത്തി. കൃത്യം നടന്ന സ്ഥലത്തു നിന്ന ശാസ്ത്രീയമായ തെളിവുകളും ശേഖരിച്ചു. ദേശീയ വനിതാ കമ്മിഷന് ഈ വിഷയത്തില് സ്വമേധയാ കേസെടുത്തിട്ടുണ്ട്്. കേസിന്റെ അന്യേഷണം വേഗത്തിലാക്കാനും റിപ്പോര്ട്ട് സമര്പ്പിക്കാനും വനിത കമ്മിഷന് പോലീസിനോട് ആവശ്യപ്പെട്ടു.