ചെന്നൈ– ഉലകനായകന്‍ കമല്‍ഹാസന്‍ രാജ്യസഭയിലേക്ക്. 2024 ലോക്‌സഭ തെരഞ്ഞെടുപ്പിന്റെ സമയത്ത് തന്നെ കമല്‍ഹാസന്റെ മക്കള്‍ നീതി മയ്യവും ഡി.എം.കെയും തമ്മില്‍ ഇക്കാര്യം ചര്‍ച്ച ചെയ്യുകയും തീരുമാനത്തിലെത്തിക്കുകയും ചെയ്തിരുന്നു. തമിഴ്‌നാട്ടിലെ ആറ് സീറ്റിലടക്കം എട്ട് രാജ്യസഭ സീറ്റുകളിലേക്കുള്ള തെരഞ്ഞെടുപ്പ് തീയതി പ്രഖ്യാപിച്ചിരുന്നു. ഇതോടെയാണ് കമല്‍ഹാസന്റെ രാജ്യസഭ പ്രവേശനത്തിന് വഴിയൊരുങ്ങിയത്.
234 അംഗ നിയമസഭയില്‍ 34 വോട്ടുകളാണ് ഒരു രാജ്യസഭ അംഗത്തിന് ജയിക്കാന്‍ വേണ്ടത്. ഇത് പ്രകാരം 159 നിയമസഭ സീറ്റുകളുള്ള ഡി.എം.കെ.ക്ക് നാല് അംഗങ്ങളെ വിജയിപ്പിക്കാന്‍ സാധിക്കും. 62 എം.എല്‍.എമാരുള്ള എ.ഐ.ഡി.എം.കെ എടപ്പാടി പളനിസ്വാമി വിഭാഗത്തിന് രണ്ട് പേരെ രാജ്യസഭയിലേക്ക് വിജയിപ്പിക്കാന്‍ സാധിക്കും. അന്‍പുമണി രാംദാസ്, എം ഷണ്‍മുഖം, എന്‍ ചന്ദ്രശേഖരന്‍, എം മുഹമ്മദ് അബ്ദുല്ല, പി.വില്‍സണ്‍, വൈക്കോ എന്നീ ആറ് അംഗങ്ങളുടെ കാലാവധി ജൂണ്‍ 25ന് അവസാനിക്കും. ജൂണ്‍ 19നാണ് രാജ്യസഭ തെരഞ്ഞെടുപ്പിന്റെ വോട്ടെടുപ്പ്. അന്ന് തന്നെ വോട്ടെണ്ണലും നടക്കും.