ന്യൂഡല്‍ഹി– ഇന്ത്യയുടെ അന്താരാഷ്ട്ര അതിര്‍ത്തികളുടെ തെറ്റായ ഭൂപടം പോസ്റ്റ് ചെയ്തതില്‍ ക്ഷമാപണം നടത്തി ഇസ്രായില്‍ സൈന്യം. ഭൂപടത്തില്‍ ജമ്മുകശ്മീര്‍ പാകിസ്ഥാന്റെ ഭാഗമായിട്ടാണ് ഇസ്രായില്‍ സേന അടയാളപ്പെടുത്തിയിരിക്കുന്നത്. അതിര്‍ത്തികളെ കൃത്യമായി ചിത്രീകരിക്കുന്നതില്‍ പരാജയപ്പെട്ടെന്ന് ഇസ്രായില്‍ പ്രതിരോധ സേന സമ്മതിച്ചു. ഇന്ത്യയുടെ ഭൂപടം തെറ്റായി ചിത്രീകരിച്ച ഐ.ഡി.എഫ് പോസ്റ്റിനെതിരെ ഇന്ത്യന്‍ ഉപയോക്താക്കള്‍ രംഗത്തുവന്നിരുന്നു. പോസ്റ്റ് പിന്‍വലിക്കാന്‍ ആവശ്യപ്പെട്ട് നിരവധി കമന്റുകള്‍ പ്രത്യക്ഷപ്പെട്ടു. ഇതിന് പിന്നാലെയാണ് ഇസ്രായില്‍ പ്രതിരോധ സേന ക്ഷമാപണം നടത്തിയത്.
ഈ പോസ്റ്റ് പ്രദേശത്തിന്റെ ഇല്ലസ്‌ട്രേഷനാണ്. ഭൂപടത്തില്‍ അതിര്‍ത്തികള്‍ കൃത്യമായി അടയാളപ്പെടുത്തുന്നതില്‍ പരാജയപ്പെട്ടു. തെറ്റുപറ്റിയതില്‍ ക്ഷമ ചോദിക്കുന്നു- ഇസ്രായില്‍ പ്രതിരോധ സേന എക്‌സില്‍ കുറിച്ചു. പതിറ്റാണ്ടുകളായി പാകിസ്ഥാനും ചൈനയും നിയമവിരുദ്ധമായി കൈവശപ്പെടുത്തിയിരിക്കുന്ന ജമ്മുകശ്മീരിന്റെയും ലഡാക്കിന്റെയും ചില ഭാഗങ്ങള്‍ രാജ്യത്ത് അവിഭാജ്യ ഘടകമാണെന്നും എപ്പോഴും തുടരുമെന്നും ഇന്ത്യ വ്യക്തമാക്കിയിട്ടുണ്ട്. ഇറാനില്‍ നിന്നുള്ള മിസൈലുകളുടെ പരിധിയെ സൂചിപ്പിക്കുന്നതാണ് ഭൂപടം. സൗദി, ലിബിയ, എത്യാപ്യ, ചൈന, റൊമാനിയ, ബള്‍ഗേറിയ, റഷ്യ, തുര്‍ക്കി തുടങ്ങിയ രാജ്യങ്ങള്‍ക്ക് ആശങ്ക ഉണ്ടാക്കുന്നതാണ് മിസൈലുകളുടെ പരിധി എന്നാണ് ഭൂപടം സൂചിപ്പിക്കുന്നത്.