പാറ്റ്ന- ആത്മഹത്യ ചെയ്യാനായി റെയിൽവേ ട്രാക്കിൽ കിടന്ന യുവതി ഉറങ്ങിപ്പോയി. തീവണ്ടിയുടെ ലോക്കോ പൈലറ്റിന്റെ സമയോചിത ഇടപെടലിൽ യുവതിക്ക് ജീവൻ തിരിച്ചുകിട്ടി. ഒരാളുമായുള്ള ബന്ധത്തെ തുടർന്ന് യുവതി വീട്ടുകാരുമായി പ്രശ്നത്തിലായിരുന്നു. ഇതിന്റെ മനോവിഷമത്തിലാണ് ആത്മഹത്യക്ക് ശ്രമിച്ചത്. റെയിൽവേ ട്രാക്കിൽ ട്രെയിൻ വരുന്നത് കാത്തു കിടന്ന യുവതി പക്ഷെ ഉറങ്ങിപ്പോയി.
ബീഹാറിലെ മോത്തിഹാരിയിൽ നിന്ന് മുസാഫർപൂരിലേക്ക് പോവുകയായിരുന്ന ട്രെയിനിൻ്റെ ലോക്കോ പൈലറ്റാണ് ആത്മഹത്യക്ക് ശ്രമിച്ച യുവതിയുടെ ജീവൻ രക്ഷിച്ചത്. എമർജൻസി ബ്രേക്ക് ചവിട്ടിയും യഥാസമയം ട്രെയിൻ നിർത്തിയും ലോക്കോ പൈലറ്റ് യുവതിയെ രക്ഷിച്ചു. ട്രെയിൻ തൊട്ടടുത്ത് വന്നിട്ടും യുവതി ഉണർന്നിരുന്നില്ല. പിന്നീട് ലോക്കോപൈലറ്റ് പിടിച്ചെഴുന്നേൽപ്പിച്ചപ്പോൾ എന്നെ വിടൂ എനിക്ക് മരിക്കണം എന്നു പറഞ്ഞ് യുവതി നിലവിളിക്കുകയും ചെയ്തു.
സംഭവത്തിൻ്റെ വീഡിയോ സോഷ്യൽ മീഡിയയിൽ വൈറലായി. വെള്ള സ്യൂട്ടും ബാഗും ധരിച്ച യുവതി ട്രാക്കിൽ കിടക്കുന്നതും വീഡിയോയിൽ വ്യക്തമാണ്.