റിയാദ്- ആവശ്യമായ മാനദണ്ഡങ്ങളും വ്യവസ്ഥകളും പാലിക്കാതെ ആഭ്യന്തര ഉംറ പാക്കേജുകളും ടൂറിസ്റ്റ് യാത്രകളും വാഗ്ദാനം ചെയ്ത 7 ഓൺലൈൻ പ്ലാറ്റ്ഫോമുകൾ സൗദി ടൂറിസം മന്ത്രാലയം ബ്ലോക്ക് ചെയ്തു. ബന്ധപ്പെട്ട മറ്റ് വകുപ്പുകളുമായി സഹകരിച്ചാണ് ടൂറിസം നിയമങ്ങൾ ലംഘിച്ച പ്ലാറ്റ്ഫോമുകൾക്കെതിരെ നടപടിയെടുത്തത്.
ടൂറിസം മേഖലയിലെ ക്രമക്കേടുകൾ തടയാനും തീർഥാടകരുടെയും വിനോദസഞ്ചാരികളുടെയും അവകാശങ്ങൾ സംരക്ഷിക്കാനുമാണ് നടപടിയെന്ന് മന്ത്രാലയം അറിയിച്ചു. വഞ്ചനാപരമായ പ്രവർത്തനങ്ങളിൽ നിന്നും നിലവാരമില്ലാത്ത സേവനങ്ങളിൽ നിന്നും ഉപഭോക്താക്കളെ സംരക്ഷിക്കേണ്ടതുണ്ട്. നിയമലംഘനങ്ങൾ തടയാൻ ഓൺലൈൻ യാത്രാ പ്ലാറ്റ്ഫോമുകൾ ഉൾപ്പെടെയുള്ള സ്ഥാപനങ്ങളിൽ പരിശോധന തുടരുമെന്നും തെറ്റുകാർക്കെതിരെ കർശന ശിക്ഷാനടപടികൾ സ്വീകരിക്കുമെന്നും ടൂറിസം മന്ത്രാലയ വക്താവ് നാസർ അൽ അൻസാരി വ്യക്തമാക്കി.
സഞ്ചാരികളുടെയും തീർഥാടകരുടെയും സുരക്ഷയ്ക്കും സേവനങ്ങളുടെ ഗുണനിലവാരത്തിനുമാണ് മന്ത്രാലയം മുൻഗണന നൽകുന്നതെന്നും ഇക്കാര്യത്തിൽ വിട്ടുവീഴ്ചയുണ്ടാകില്ലെന്നും അദ്ദേഹം കൂട്ടിച്ചേർത്തു. വഞ്ചിക്കപ്പെടാതിരിക്കാൻ ലൈസൻസുള്ള പ്ലാറ്റ്ഫോമുകളിലൂടെയും അംഗീകൃത യാത്രാ-ടൂറിസം ഓഫീസുകളിലൂടെയും മാത്രം സേവനങ്ങൾ ലഭ്യമാക്കാൻ പൊതുജനങ്ങളോട് മന്ത്രാലയം അഭ്യർഥിച്ചു.
ഏറ്റവും പുതിയ വാർത്തകൾ വാട്സാപ്പിൽ ലഭിക്കാൻ Join Our WhatsApp Group