അബൂദാബി– ഔദ്യോഗിക സന്ദർശനത്തിൻറെ ഭാഗമായി യുഎഇയിലെത്തിയ ഓസ്ട്രേലിയൻ പ്രധാനമന്ത്രി ആൻറണി ആൽബനീസ് അബുദാബി മുഷ്‌റിഫിലെ ലുലു ഹൈപ്പർമാർക്കറ്റ് സന്ദർശിച്ചു. വ്യാപാരനയം വിപുലമാക്കുന്നതിൻറെ ഭാഗമായി യുഎസ്, യുകെ, എന്നിവടങ്ങളിലെ സന്ദർശനങ്ങൾക്ക് പിന്നാലെയാണ് പ്രധാനമന്ത്രി ആൻറണി ആൽബനീസ് യുഎഇയിലെത്തിയത്. ലുലു ഗ്രൂപ്പ് ചെയർമാൻ എം.എ. യൂസഫലിക്കൊപ്പം ലുലു ഹൈപ്പർ മാർക്കറ്റിലെത്തിയ പ്രധാനമന്ത്രി ആൻറണി ആൽബനീസ് ഓസ്ട്രേലിയൻ ഉത്പന്നങ്ങളുള്ള സ്റ്റാളുകൾ സന്ദർശിച്ചു.
സന്ദർശനത്തിനിടെ തങ്ങളുടെ രാജ്യത്ത് ലുലു ഹൈപ്പർ മാർക്കറ്റ് ആരംഭിക്കാൻ എം.എ. യൂസഫലിയെ പ്രധാനമന്ത്രി ആൻറണി ആൽബനീസ് ക്ഷണിക്കുകയും ചെയ്തു. കർഷകരും വിതരണക്കാരുമായി നേരിട്ട് ബന്ധമുള്ള ലുലുവിൻറെ സേവനം, ഓസ്ട്രേലിയക്ക് ഗുണകരമാവുമെന്ന് പ്രധാനമന്ത്രി ആൻറണി ആൽബനീസ് ചൂണ്ടിക്കാട്ടി.
ഓസ്‌ട്രേലിയ-യുഎഇ സ്വതന്ത്ര വ്യാപാര കരാർ ഒക്‌റ്റോബർ 1 മുതൽ നടപ്പാക്കുമെന്നും ഓസ്‌ട്രേലിയയുടെ സുപ്രധാന വ്യാപാര പങ്കാളിയായി യുഎഇ മാറുമെന്നും പ്രധാനമന്ത്രി ആൻറണി ആൽബനീസ് വ്യക്തമാക്കി. ഓസ്‌ട്രേലിയയിൽ നിന്നുള്ള ഏറ്റവും മികച്ച ഉത്പന്നങ്ങളാണ് മിഡിൽ ഈസ്റ്റിലടക്കം ലുലു ലഭ്യമാക്കുന്നതെന്നും പ്രീമിയം ഓസ്ട്രേലിയൻ മാംസം, പഴം പച്ചക്കറി ഉത്പന്നങ്ങൾ എന്നിവയുടെ വിപുലമായ ശേഖരമാണ് ലുലുവിലുള്ളതെന്നും പ്രാദേശിക കർഷകർക്കും വിതരണകാർക്കും പിന്തുണ നൽകുക കൂടിയാണ് ലുലുവെന്നും ചെയർമാൻ എം.എ. യൂസഫലി പറഞ്ഞു.
യുഎഇയിലെ ഓസ്ട്രേലിയൻ അംബാസഡർ റിദ്വാൻ ജാദ്വത്, ഓസ്‌ട്രേലിയയിലെ യുഎഇ അംബാസഡർ എ.എ. ഫഹദ് ഉബൈദ് മുഹമ്മദ്, ലുലു ഗ്രൂപ്പ് ഡയറക്റ്റർ ആൻഡ് ചീഫ് സസ്‌റ്റൈനബിളിറ്റി ഓഫിസർ മുഹമ്മദ് അൽത്താഫ്, ഗ്ലോബൽ ഓപ്പറേഷൻ ഡയറക്റ്റർ ഷാബു അബ്ദുൾ മജീദ്, ഡയറക്റ്റർ ഓഫ് മാർക്കറ്റിങ് ആൻഡ് കമ്മ്യൂണിക്കേഷൻ ഡയറക്റ്റർ വി. നന്ദകുമാർ തുടങ്ങിയവരും പരിപാടിയിൽ പങ്കെടുത്തു.