ദുബായ്: ലൈസൻസില്ലാത്തതും നിയമവിരുദ്ധവുമായ രീതിയിൽ പ്രവർത്തിക്കുന്ന മസാജ് സെന്ററുകളുടെ കാർഡുകൾ പ്രിന്‍റ് ചെയ്ത നാല് പ്രസുകൾ ദുബായിയിൽ അടച്ചുപൂട്ടി. പ്രസുകളിലെ ജീവനക്കാരെ അറസ്റ്റ് ചെയ്തതായും ദുബായ് പൊലീസ് എക്സിലൂടെ അറിയിച്ചു. ഇത്തരം പ്രസുകളിൽ പ്രവർത്തിക്കുന്ന എല്ലാവരും നിയമ നടപടി നേരിടേണ്ടിവരുമെന്ന് പോലീസ് അധികൃതർ വ്യക്തമാക്കി.നഗരത്തിന്‍റെ വിവിധ ഭാഗങ്ങളിൽ ഇത്തരത്തിൽ നിയമവിരുദ്ധമായി വിതരണം ചെയ്യുന്ന ഇത്തരം കാർഡുകളെ കുറിച്ച് നേരെത്തെ അധികൃതർ മുന്നറിയിപ്പ് നൽകിയിരുന്നു.
നടിമാരുടെയും മറ്റും അശ്ലീല ചിത്രങ്ങളും അടങ്ങിയ ഇത്തരം കാർഡുകൾ റോഡുകളിലും പാർക്കിങ് സ്ഥലങ്ങളിലും വിതറിയും പാർക്ക് ചെയ്ത വാഹനങ്ങളിലെ ഡോറിലും മറ്റും കൊളുത്തിയുമാണ് ഇവർ കടന്ന് കളയുന്നത്. ഇത്തരം മസാജ് കാർഡുകളിലെ ഫോൺ നമ്പറുകളിൽ ബന്ധപ്പെടരുതെന്നും, മോഷ്ടിക്കപ്പെടാൻ സാധ്യതയുണ്ടെന്നും അധികൃതർ മുന്നറിയിപ്പ് നൽകി.
സാമൂഹിക സുരക്ഷ ഉറപ്പുവരുത്തുന്നതിനും ഇത്തരം പ്രശ്നങ്ങൾ ഇല്ലാതാക്കാനുമാണ് നടപടിയെന്ന് അധികൃതർ വിശദീകരിച്ചു. മസാജ് കാർഡുകളുമായി ബന്ധപ്പെട്ട മോശമായ രീതികളെക്കുറിച്ച് അന്വേഷിക്കുന്നതിനായി ജനറൽ ഡിപ്പാർട്ട്‌മെന്‍റ് ഓഫ് ക്രിമിനൽ ഇൻവെസ്റ്റിഗേഷൻ പ്രത്യേക സംഘത്തെ തന്നെരൂപീകരിച്ചിട്ടുണ്ടെന്നും അധികൃതർ വ്യക്തമാക്കി.