അബുദാബി: അൽഐൻ പുസ്തകോത്സവത്തിൽ പ്രസാധകരുടെ എണ്ണത്തിൽ റെക്കോഡ് വർധന. അബുദാബി അറബിക് ലാംഗ്വേജ് സെന്റർ സംഘടിപ്പിക്കുന്ന മേളയിൽ 260 പ്രസാധകരാണ് രജിസ്ട്രേഷന് വേണ്ടി അപേക്ഷിച്ചിട്ടുള്ളത്. കഴിഞ്ഞ വർഷത്തേക്കാൾ 73 ശതമാനം വർധനയാണിത്.
137 പ്രദർശകർ എ.എൽ.സിയുടെ 10% മുൻകൂർ വിലക്കുറവിന്റെ ആനുകൂല്യം നേടി.
നവംബർ 17 മുതൽ 23 വരെയാണ് അൽ ഐൻ പുസ്തകമേള നടക്കുന്നത്. പുസ്തകത്തെ ഒരു സാംസ്കാരിക ചിഹ്നമാക്കി പരിവർത്തനം ചെയ്യാനുള്ള എ എൽ സിയുടെ ശ്രമം വിജയിക്കുന്നതിന്റെ സാക്ഷ്യമാണ് വർധിച്ചുവരുന്ന പ്രാതിനിധ്യമെന്ന് എഎൽസി ചെയർമാൻ ഡോ.അലി ബിൻ തമീം പറഞ്ഞു. 2472 ചതുരശ്ര മീറ്റർ വിസ്തൃതിയിലാണ് വേദി.
രജിസ്ട്രേഷൻ അവസാനിച്ച സെപ്റ്റംബർ 19 ന് മുൻപ് തന്നെ മുഴുവൻ സ്റ്റാളുകളും വിറ്റുപോയതായി അധികൃതർ പറഞ്ഞു. ഈ പതിപ്പിൽ 150 പ്രദർശകർ 60000 ടൈറ്റിലുകൾ പ്രദർശിപ്പിക്കും.400 പരിപാടികളും യുവാക്കൾക്കും കുട്ടികൾക്കും വേണ്ടി 500 വിദ്യാഭ്യാസ – വിനോദ ശില്പശാലകളും നടത്തും.