നമ്പർ പ്ലേറ്റ് ലേലത്തിലൂടെ 81 മില്യൻ ദിർഹം; ദുബായ് ആർടിഎക്ക് റെക്കോർഡ് നേട്ടം

ദുബായ്: വാഹന നമ്പർ പ്ലേറ്റുകൾക്കായുള്ള 117-ാമത് ഓപ്പൺ ലേലത്തിൽ 81 മില്യൺ ദിർഹത്തിന്‍റെ റെക്കോർഡ് വരുമാനം നേടി ദുബായ് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (ആർടിഎ). ലേലത്തിലൂടെ നേടുന്ന ചരിത്രത്തിലെ ഏറ്റവും ഉയർന്ന വരുമാനമാണിത്. കഴിഞ്ഞ ദിവസം ഇന്‍റർകോണ്ടിനെന്‍റൽ ദുബായ് ഫെസ്റ്റിവൽ സിറ്റി ഹോട്ടലിൽ നടന്ന ലേലത്തിൽ BB 55 എന്ന നമ്പറിലുള്ള പ്ലേറ്റാണ് ഏറ്റവും ഉയർന്ന തുകക്ക് ലേലത്തിൽ പോയത്. 6.3 മില്യൻ ദിർഹമായിരുന്നു ഇതിന്‍റെ വില. AA 21 പ്ലേറ്റ് 6.16 മില്യൻ ദിർഹത്തിനും ബിബി 100 പ്ലേറ്റ് 5 മില്യൻ ദിർഹത്തിനും, ബിബി 11111 പ്ലേറ്റ് 4.21 മില്യൻ ദിർഹത്തിനുമാണ് വിറ്റുപോയത്. AA, BB, K, O, T, U, V, W, X, Y, Z എന്നീ കോഡുകളിലായി രണ്ട്, മൂന്ന്, നാല്, അഞ്ച് അക്കങ്ങൾ ഉൾക്കൊള്ളുന്ന 90 പ്രീമിയം നമ്പർ പ്ലേറ്റുകളാണ് ആർടിഎ ലേലത്തിൽ വെച്ചത്. ലേലത്തിൽ മൊത്തം 81.178 ദശലക്ഷം ദിർഹമാണ് ലഭിച്ചത്.