അബുദാബി – യു.എ.ഇ വ്യോമാതിര്ത്തി താല്ക്കാലികമായി പൂര്ണ്ണമായും അടച്ചുപൂട്ടിയതായി ജനറല് സിവില് ഏവിയേഷന് അതോറിറ്റി അറിയിച്ചു. അതിവേഗം വികസിച്ചുകൊണ്ടിരിക്കുന്ന പ്രാദേശിക സുരക്ഷാ സംഭവവികാസങ്ങള്ക്കിടയില് വിമാനങ്ങളുടെയും വിമാന ജീവനക്കാരുടെയും സുരക്ഷ ഉറപ്പാക്കാനും യു.എ.ഇയുടെ ഭൂപ്രദേശം സംരക്ഷിക്കാനും വേണ്ടിയാണ് ഈ നടപടി. ദേശീയ-അന്തർദേശീയ തലത്തിലെ വിവിധ വകുപ്പുകളുമായി ആലോചിച്ച ശേഷമാണ് ഇങ്ങനെയൊരു തീരുമാനമെടുത്തതെന്ന് സിവിൽ ഏവിയേഷൻ അതോറിറ്റി അറിയിച്ചു. സുരക്ഷയുമായി ബന്ധപ്പെട്ട എല്ലാ കാര്യങ്ങളും വിശദമായി പരിശോധിച്ചിട്ടുണ്ട്. ഇതുമായി ബന്ധപ്പെട്ട പുതിയ വിവരങ്ങൾ കൃത്യസമയത്ത് ഔദ്യോഗികമായി അറിയിക്കുമെന്നും അധികൃതർ വ്യക്തമാക്കി.
വിമാന ഷെഡ്യൂളുകളെ കുറിച്ചുള്ള ഏറ്റവും പുതിയ അപ്ഡേറ്റുകള് ലഭിക്കുന്നതിന് യാത്രക്കാര് അതത് എയര്ലൈനുകളുമായി ബന്ധപ്പെടണമെന്ന് അതോറിറ്റി അറിയിച്ചു. ബന്ധപ്പെട്ട പ്രാദേശിക അധികാരികളുമായി ഏകോപിപ്പിച്ച് വിമാന കമ്പനികള് യാത്രക്കാര്ക്ക് താമസവും ആവശ്യമായ സഹായവും നല്കും. യാത്രക്കാരുടെയും വിമാന ജീവനക്കാരുടെയും സുരക്ഷയാണ് തങ്ങളുടെ മുന്ഗണന. ഉയര്ന്ന നിലവാരത്തിലുള്ള സുരക്ഷ ഉറപ്പാക്കുന്നതിന് ആവശ്യമായ എല്ലാ നടപടികളും സ്വീകരിക്കുന്നുണ്ട്. ഈ അസാധാരണ സാഹചര്യങ്ങളില് പൊതുജനങ്ങളുടെ സഹകരണത്തിനും മനസ്സിലാക്കലിനും ജനറല് സിവില് ഏവിയേഷന് അതോറിറ്റി നന്ദി പ്രകടിപ്പിക്കുകയും ഔദ്യോഗിക ഉറവിടങ്ങളില് നിന്ന് മാത്രം വിവരങ്ങള് ശേഖരിക്കാന് എല്ലാവരോടും ആവശ്യപ്പെടുകയും ചെയ്തു.