ജിദ്ദ – ഇഖാമ, തൊഴില്, അതിര്ത്തി സുരക്ഷാ നിയമങ്ങള് ലംഘിച്ചതിന് സ്വദേശികളും വിദേശികളും അടക്കം 19,920 പേരെ ജവാസാത്ത് ഡയറക്ടറേറ്റിനു കീഴില് വിവിധ പ്രവിശ്യകളില് പ്രവര്ത്തിക്കുന്ന അഡ്മിനിസ്ട്രേറ്റീവ് കമ്മിറ്റികള് കഴിഞ്ഞ മാസം (ശഅബാന്) ശിക്ഷിച്ചതായി ജവാസാത്ത് അറിയിച്ചു. ഇവര്ക്ക് തടവും പിഴയും നാടുകടത്തലുമാണ് ശിക്ഷ ലഭിച്ചത്. ഇഖാമ, തൊഴില് നിയമ ലംഘകര്ക്കും നുഴഞ്ഞുകയറ്റക്കാര്ക്കും ജോലിയും അഭയവും യാത്രാ സൗകര്യങ്ങളും മറ്റു സഹായങ്ങളും നല്കരുതെന്ന് സ്വദേശികളോടും വിദേശികളോടും സ്ഥാപന ഉടമകളോടും ജവാസാത്ത് ഡയറക്ടറേറ്റ് ആവശ്യപ്പെട്ടു.
ഇഖാമ, തൊഴില് നിയമ ലംഘകരെയും നുഴഞ്ഞുകയറ്റക്കാരെയും കുറിച്ച് മക്ക, മദീന, റിയാദ്, കിഴക്കന് പ്രവിശ്യകളില് 911 എന്ന നമ്പറില് ബന്ധപ്പെട്ടും മറ്റു പ്രവിശ്യകളില് 999 എന്ന നമ്പറില് ബന്ധപ്പെട്ടും റിപ്പോര്ട്ട് ചെയ്ത് എല്ലാവരും സഹകരിക്കണമെന്നും ജവാസാത്ത് ഡയറക്ടറേറ്റ് അറിയിച്ചു. നിയമ ലംഘകരെ കുറിച്ച് നല്കുന്ന വിവരങ്ങള് തീര്ത്തും രഹസ്യമായി കൈകാര്യം ചെയ്യുമെന്നും വിവരം നല്കുന്നവര് ഒരുവിധ ഉത്തരവാദിത്തവും വഹിക്കേണ്ടിവരില്ലെന്നും ജവാസാത്ത് പറഞ്ഞു.