റിയാദ്- സൗദി അറേബ്യയിലെ തൃശ്ശൂര്‍ ജില്ലക്കാരുടെ കല സാംസ്‌കാരിക ജീവകാരുണ്യ സംഘടനയായ തൃശൂര്‍ ജില്ലാ സൗഹൃദവേദിയുടെ 2025 ലെ മെമ്പര്‍ഷിപ് ക്യാമ്പയിന്തുടക്കമായി.
തൃശൂര്‍ മുള്ളൂര്‍ക്കര സ്വദേശി അബ്ദുറസാക്കിനും ചാവക്കാട് സ്വദേശി സുബൈറിനും അംഗത്വം നല്‍കി അംഗത്വ വിതരണത്തിന്റെ ഔപചാരിക ഉദ്ഘാടനം തൃശൂര്‍ ജില്ല സൗഹൃദവേദി പ്രസിഡന്റ് കൃഷ്ണകുമാര്‍ നിര്‍വ്വഹിച്ചു.
കഴിഞ്ഞ 14 വര്‍ഷമായി സൗദിയിലും ഖത്തറിലും പ്രവര്‍ത്തിക്കുന്ന തൃശൂര്‍ ജില്ലാ സൗഹൃദവേദി ജീവകാരുണ്യ കല സാംസ്‌കാരിക രംഗങ്ങളില്‍ നിറസാന്നിധ്യമാണ്. റിയാദിലും ജിദ്ദയിലും ദമാമിലും അല്‍ഖര്‍ജ്ജിലുമായി ഏകദേശം 800 അംഗങ്ങള്‍ ഉള്ള സംഘടനയുടെ സ്ഥാപകനേതാവ് അന്തരിച്ച പത്മശ്രീ സി. കെ മേനോന്‍ ആയിരുന്നു. അദ്ദേഹത്തിന്റെ മകന്‍ ജെ കെ മേനോന്‍ ആണ് ഇപ്പോള്‍ സംഘടനയുടെ മുഖ്യരക്ഷാധികാരി.
സംഘടനാ തലത്തില്‍ കേരളത്തില്‍ ആദ്യമായി ഒരു എന്‍ ആര്‍ ഐ കോഓപ്പറേറ്റീവ് സൊസൈറ്റി തുടങ്ങിയത് തൃശൂര്‍ ജില്ലാ സൗഹൃദവേദിയാണ്. ഇപ്പോള്‍ തൃശൂരിലും തൃശൂര്‍ ജില്ലയിലെ തളിക്കുളത്തുമായി രണ്ടു സൊസൈറ്റികള്‍ തൃശൂര്‍ ജില്ലാ സൗഹൃദവേദിയുടെ അഭിമാനമായി വളരെ നല്ല രീതിയില്‍ പ്രവര്‍ത്തിച്ചു കൊണ്ടിരിക്കുന്നു. വളരെ മിതമായ നിരക്കില്‍ വായ്പകള്‍ , വാഹനവായ്പകള്‍, എന്നിവ സൊസൈറ്റി നല്‍കിവരുന്നുണ്ട്.
പ്രവാസ ജീവിതം അവസാനിപ്പിച്ചു നാട്ടിലേക്ക് പോകുന്ന അംഗങ്ങള്‍ക്ക് സൗഹ്രദവേദി, 1000 രൂപ പെന്‍ഷനും, അംഗമായിരിക്കെ മരണപ്പെടുന്നവര്‍ക്ക് രണ്ടേകാല്‍ ലക്ഷം രൂപയും മക്കളുടെ വിവാഹത്തിന് ധന സഹായവും നല്‍കിവരുന്നുണ്ട്. കൂടാതെ അംഗങ്ങളുടെ മാതാപിതാക്കളുടെ മരണാനന്തര ചടങ്ങുകള്‍ക്ക് സഹായവും സംഘടന നല്‍കി വരുന്നു.
അംഗത്വ കാമ്പയിന് പ്രസിഡന്റ് കൃഷ്ണകുമാര്‍ അധ്യക്ഷത വഹിച്ചു. ചടങ്ങിന് സുരേഷ് ശങ്കര്‍ സ്വാഗതവും ഗിരിജന്‍ നായര്‍ നന്ദിയും പറഞ്ഞു. ട്രഷറര്‍ ഷാഹിദ് അറക്കല്‍, വൈസ് പ്രസിഡന്റ് നമസ്‌തേ സന്തോഷ്, ശരത് ജോഷി, സുരേഷ് തിരുവില്ലാമല, ധനജ്ഞയ കുമാര്‍, സൂരജ് കുമാര്‍, അരുണന്‍ മുത്താട്ടു എന്നിവര്‍ പരിപാടികള്‍ക്കു നേതൃത്വം നല്‍കി.