ജിദ്ദ – നിരവധി സ്ത്രീകള്‍ അടക്കം വിസിറ്റ് വിസക്കാരായ 108 പേരെ ട്രെയിലറുകളിലുണ്ടാക്കിയ രഹസ്യ അറകളില്‍ ഒളിപ്പിച്ച് മക്കയിലേക്ക് കടത്താന്‍ ശ്രമിച്ച മൂന്നു സൗദി പൗരന്മാരെ ഹജ് സുരക്ഷാ സേന അറസ്റ്റ് ചെയ്തു. വിസിറ്റ് വിസക്കാരെ കാറുകളില്‍ വിജനമായ സ്ഥലത്തെ ചുറ്റുമതിലോടു കൂടിയ കോംപൗണ്ടില്‍ എത്തിച്ച് ട്രെയിലറുകളിലെ രഹസ്യ അറകളില്‍ ഒളിപ്പിച്ച് മക്കിയിലേക്ക് കടത്താനാണ് സംഘം ശ്രമിച്ചത്.
ഡ്രോണ്‍ ഉപയോഗിച്ച് നടത്തിയ നിരീക്ഷണത്തിലൂടെയും ഫീല്‍ഡ് പരിശോധനയിലൂടെയുമാണ് നിയമ ലംഘകരെ കടത്താനുള്ള ശ്രമങ്ങള്‍ സുരക്ഷാ സൈനികര്‍ കണ്ടെത്തിയത്. സംഘത്തിന്റെ കോംപൗണ്ട് സുരക്ഷാ സൈനികര്‍ വളഞ്ഞ് ട്രെയിലറുകളിലെ രഹസ്യ അറകളില്‍ ഒളിച്ച നിയമ ലംഘകരെ പിടികൂടുന്നതിന്റെ ദൃശ്യങ്ങള്‍ അടങ്ങിയ വീഡിയോ പൊതുസുരക്ഷാ വകുപ്പ് പുറത്തുവിട്ടു. നിയമാനുസൃത ശിക്ഷാ നടപടികള്‍ സ്വീകരിക്കാന്‍ സൗദി പൗരന്മാരെയും വിസിറ്റ് വിസക്കാരെയും പിന്നീട് ബന്ധപ്പെട്ട വകുപ്പിന് കൈമാറി.
ഹജ് പെര്‍മിറ്റില്ലാത്തവരെ മക്കയിലേക്ക് കടത്താന്‍ ശ്രമിക്കുന്നതിനിടെ പിടിയിലായ 17 പേരെ ആഭ്യന്തര മന്ത്രാലയത്തിനു കീഴിലെ സീസണല്‍ അഡ്മിനിസ്‌ട്രേറ്റീവ് കമ്മിറ്റികള്‍ കഴിഞ്ഞ ദിവസം ശിക്ഷിച്ചു. ആറു വിദേശികള്‍ക്കും പതിനൊന്നു സൗദി പൗരന്മാര്‍ക്കുമാണ് ശിക്ഷ. ഇവര്‍ക്ക് തടവും ഒരു ലക്ഷം റിയാല്‍ വരെ പിഴയുമാണ് ശിക്ഷ. നിയമ ലംഘകരെ കടത്താന്‍ ഉപയോഗിച്ച വാഹനങ്ങള്‍ കണ്ടുകെട്ടാന്‍ കോടതി വഴി നിയമ നടപടികള്‍ സ്വീകരിക്കാനും തീരുമാനമുണ്ട്. നിയമ ലംഘകരായ വിദേശികളെ ശിക്ഷ പൂര്‍ത്തിയാക്കിയ ശേഷം സൗദിയില്‍ നിന്ന് നാടുകടത്തി പത്തു വര്‍ഷത്തേക്ക് പ്രവേശന വിലക്കേര്‍പ്പെടുത്താനും വിധിയുണ്ട്. പെര്‍മിറ്റില്ലാതെ ഹജ് നിര്‍വഹിക്കാന്‍ ശ്രമിച്ച് പിടിയിലായവര്‍ക്ക് 20,000 റിയാല്‍ വരെ തോതില്‍ പിഴ ചുമത്തി.