മക്ക – ദക്ഷിണ മക്കയിലെ വാദി നുഅ്മാനില്‍ ശക്തമായ മലവെള്ളപ്പാച്ചിലിടെ ജീവന്‍ പണയം വെച്ച് സൗദി യുവാവ് കാറില്‍ താഴ്‌വര മുറിച്ചുകടന്നു. ശക്തമായ ഒഴുക്കില്‍ ഒന്നലധികം തവണ കാറിന്റെ നിയന്ത്രണം നഷ്ടപ്പെട്ടെങ്കിലും ഭാഗ്യം കൊണ്ട് അപകടത്തില്‍ പെടാതെ മറുകരയിലെത്താന്‍ യുവാവിന് സാധിച്ചു. ഇതിന്റെ ദൃശ്യങ്ങള്‍ അടങ്ങിയ വീഡിയോ ദൃക്‌സാക്ഷികളില്‍ ഒരാള്‍ ചിത്രീകരിച്ച് സാമൂഹികമാധ്യമങ്ങളിലൂടെ പുറത്തുവിട്ടു.
സൗദിയില്‍ മലവെള്ളപ്പാച്ചിലിനിടെ താഴ്‌വരകള്‍ മുറിച്ചുകടക്കുന്നത് ഗതാഗത നിയമ ലംഘനമാണ്. ഇതിന് 10,000 റിയാല്‍ പിഴ ലഭിക്കും. മലവെള്ളപ്പാച്ചിലിനിടെ താഴ്‌വരകള്‍ മുറിച്ചുകടക്കുന്നതിനെതിരെ സിവില്‍ ഡിഫന്‍സും സുരക്ഷാ വകുപ്പുകളും ആവര്‍ത്തിച്ച് മുന്നറിയിപ്പ് നല്‍കുന്നുണ്ട്. ഇതിനിടെയാണ് നിയമ, നിര്‍ദേശങ്ങളെല്ലാം അവഗണിച്ചും സ്വന്തം ജീവന്‍ തൃണവല്‍ഗണിച്ചും യുവാവ് സാഹസികമായി താഴ്‌വര മുറിച്ചുകടന്നത്.