ജിദ്ദ- വേൾഡ് ഓഡിയോ വിഷ്വൽ ആന്റ് എന്റർടൈയ്ൻമെന്റ് സമ്മിറ്റ്(വേവ്സ്) നിർദ്ദേശ്ങൾക്കനുസൃതമായി ലോകമെമ്പാടുമുള്ള വിനോദ വ്യവസായങ്ങൾക്കും ഒപ്പം പ്രതിഭാസംഗമങ്ങൾക്കും സംയുക്ത പങ്കാളിത്തത്തോടെ കേന്ദ്ര ഗവൺമെന്റ് ആവശ്യമായ സഹായം നൽകുമെന്ന് കേന്ദ്ര വാർത്താ വിതരണ മന്ത്രാലയം സെക്രട്ടറി ശ്രുതി സിംഗ് വ്യക്തമാക്കി. ആനിമേഷൻ, ഗെയിമിംഗ്, കോമിക്സ് ആന്റ് വിഷ്വൽ എഫക്ട് തുടങ്ങിയ സെക്ടറുകളിലാണ് ലോക സംരംഭകരും പ്രതിഭകളുമായുള്ള പങ്കാളിത്ത ബിസിനസിന് കേന്ദ്രം സഹായം നൽകുന്നതെന്നും പഞ്ചാബ് കേഡറിലെ ഐ.എ.എസ് ഉദ്യോഗസ്ഥനായ ശ്രുതി സിംഗ് പറഞ്ഞു.
എന്റർടെയ്ൻമെന്റ് രംഗത്ത് അന്താരാഷ്ട്ര സഹകരണം ഉറപ്പാക്കുകയാണ് വെയ്വ്സ് ബസാറിന്റെ ലക്ഷ്യമെന്നും ജിദ്ദ റെഡ് സീ ഇന്റർനാഷണൽ ചലച്ചിത്രോത്സവത്തിന്റെ നാലാം ദിവസമായ ഇന്ന് ഇന്ത്യൻ കോൺസുലേറ്റുമായി സഹകരിച്ച് നടത്തിയ പാനൽ ചർച്ചയിൽ അവർ വ്യക്തമാക്കി. സിനിമാ നിർമ്മാതാക്കളുടെയും ഫിലിം നിർമാണ കമ്പനി പ്രതിനിധികളുമായുള്ള സംയുക്ത ചർച്ചക്ക് നേതൃത്വം നൽകിയ ശ്രുതി സിംഗ് വിവിധ അന്താരാഷ്ട്ര ഫിലിം ഫെസ്റ്റിവെലുകളിൽ വേവ്സ് ബസാറിന്റെ ലക്ഷ്യങ്ങൾ വീഡിയോ പ്രസന്റേഷൻ വഴി അവതരിപ്പിച്ചതിന് വൻ സ്വീകാര്യത ലഭിച്ചിട്ടുണ്ടെന്നും വെളിപ്പെടുത്തി. കോൺസുൽ ജനറൽ ഫഹദ് അഹമ്മദ് ഖാൻ സൂരി, കൾച്ചറൽ കോൺസുൽ മുഹമ്മദ് ഹാഷിം എന്നിവരും ചർച്ചയിൽ പങ്കെടുത്തു.