ജിദ്ദ: സൗദി കലാ സംഘം രണ്ടാമത് മെഗാ ഷോ ജിദ്ദ ബീറ്റ്സ് 2024 ഈ മാസം 27 ന് വെള്ളിയാഴ്ച അരങ്ങേറുമെന്ന് ഭാരവാഹികള്‍ പത്ര സമ്മേളനത്തില്‍ അറിയിച്ചു. സൗദി അറേബ്യയിലെ കലാകാരന്മാരുടെ കൂട്ടായ്മയായ സൗദി കലാ സംഘം സംഘടിപ്പിക്കുന്ന രണ്ടാമത് മെഗാ ഷോയാണ് ജിദ്ദ ബീറ്റ്സ് 2024. ജിദ്ദ റിഹാബിലെ ലയാലി ഓഡിറ്റോറിയത്തിൽ 27 ന് വൈകുന്നേരം നാലു മണിമുതലാണ് കലാ പരിപാടികള്‍ ആരംഭിക്കുന്നത്.
മിഡിൽ ഈസ്റ്റിൽ ആദ്യമായാണ് ഇത്തരം ഒരു കൂട്ടായ്മ. രാജ്യത്തിന്‍റെ വിവിധ പ്രവിശ്യകളിലുള്ള കലാകാരന്മാരെ കോർത്തിണക്കി കഴിവുകൾ പരിപോഷിപ്പിക്കുക എന്ന ഉദ്ദേശത്തോടെ ആറ് വർഷങ്ങൾക്കു മുമ്പാണ് സൗദി കലാ സംഘം ആരംഭിക്കുന്നത്.
കഴിഞ്ഞ വർഷം അവതരിപ്പിച്ച കലാപരിപാടികൾ വളരെ ശ്രദ്ധേയമായിരുന്നു. ജിദ്ദയിൽ ആദ്യമായാണ് വിവിധ പ്രദേശങ്ങളിലുള്ള കലാകാരന്മാരെ കോര്‍ത്തിണക്കിക്കൊണ്ട് കലോത്സവം സംഘടിപ്പിക്കുന്നത്. മെഗാ ഷോയിലൂടെ ലഭിക്കുന്ന സഹായങ്ങൾ വയാനാട് ദുരന്തത്തില്‍പെട്ടവരുടെ കുടുംബങ്ങള്‍ക്ക് സമര്‍പ്പിക്കുമെന്ന് ഭാരവാഹികള്‍ പറഞ്ഞു. ചടങ്ങില്‍ മികച്ച കലാകാരന്മാരെ ആദരിക്കും.
ഭാരവാഹികളായ റഹീം ഭരതന്നൂർ, ഹസ്സൻ കൊണ്ടോട്ടി, നവാസ് ബീമാപ്പള്ളി, സോഫിയ സുനിൽ, റാഫി ബീമാപള്ളി എന്നിവര്‍ പത്രസമ്മേളനത്തില്‍ പങ്കെടുത്തു.