റിയാദ് – ലോകത്തെങ്ങുമുള്ള വിസ ക്രെഡിറ്റ് കാര്‍ഡ് ഉടമകള്‍ക്ക് എളുപ്പത്തില്‍ സൗദി സന്ദര്‍ശന വിസ അനുവദിക്കുന്ന പുതിയ സംരംഭത്തിന് തുടക്കം. വിസ ബൈ പ്രൊഫൈല്‍ എന്ന പേരിട്ട സംരംഭം റിയാദില്‍ നടക്കുന്ന പ്രഥമ ടൂറൈസ് ഫോറത്തിലാണ് പ്രഖ്യാപിച്ചത്. ആഗോളതലത്തില്‍ ഇത്തരത്തിലുള്ള ആദ്യത്തെ സംരംഭമാണിത്. സൗദി അറേബ്യ സന്ദര്‍ശിക്കാന്‍ ആഗ്രഹിക്കുന്ന യോഗ്യരായ വിസ കാര്‍ഡ് ഉടമകള്‍ക്ക് വേഗത്തിലുള്ള വിസ പ്രോസസ്സിംഗ് ലഭിക്കാന്‍ ഈ സംരംഭം സഹായിക്കുന്നു. യോഗ്യരായ യാത്രക്കാര്‍ക്ക് പാസ്പോര്‍ട്ട്, വിസ കാര്‍ഡ് വിവരങ്ങള്‍ മാത്രം ഉപയോഗിച്ച് നിമിഷങ്ങള്‍ക്കുള്ളില്‍ ഇലക്‌ട്രോണിക് ടൂറിസ്റ്റ് വിസകള്‍ ലഭിക്കും.
വിദേശ മന്ത്രാലയം, ആഭ്യന്തര മന്ത്രാലയം, ടൂറിസം മന്ത്രാലയം എന്നിവയുമായി സഹകരിച്ച് സൗദി ടൂറിസം അതോറിറ്റി വിസ കമ്പനിയുടെയും പങ്കാളിത്ത ബാങ്കുകളുടെയും സഹകരണത്തോടെയാണ് ഈ സംരംഭം വികസിപ്പിച്ചത്. യാത്രാ വെല്ലുവിളികള്‍ കുറക്കുക, സൗദിയിലേക്ക് വിനോദസഞ്ചാരികളെ ആകര്‍ഷിക്കുക, ഡിജിറ്റല്‍ സംയോജനത്തിലൂടെയും നിയന്ത്രണ സഹകരണത്തിലൂടെയും വിസ അനുവദിക്കുന്നതുമായി ബന്ധപ്പെട്ട തീരുമാനമെടുക്കല്‍ ത്വരിതപ്പെടുത്തുക എന്നിവയാണ് ഇതിന്റെ ലക്ഷ്യം. സാമ്പത്തിക ഭദ്രത ഉറപ്പാക്കുന്നതിന് യാത്രക്കാരുടെ ക്രെഡിറ്റ് യോഗ്യത വിലയിരുത്തുന്നതിനെ ഈ സംരംഭം അടിസ്ഥാനമാക്കുന്നു. രാജ്യങ്ങളുടെ ആവശ്യകതകള്‍ നിറവേറ്റാനും ലോകമെമ്പാടുമുള്ള ദശലക്ഷക്കണക്കിന് പുതിയ യാത്രക്കാര്‍ക്കുള്ള വിസ അംഗീകാര നടപടിക്രമങ്ങള്‍ സുഗമമാക്കാനും ഈ സംവിധാനം സഹായിക്കുന്നു.
2026 ല്‍ ആരംഭിക്കുന്ന സംരംഭം, പദ്ധതിയില്‍ പങ്കാളിത്തം വഹിക്കുന്ന ബാങ്കുകള്‍ക്ക് ലഭ്യമായിരിക്കും. കൂടുതല്‍ ബാങ്കുകളും ക്രെഡിറ്റ് കാര്‍ഡ് ദാതാക്കളും പങ്കാളിത്തത്തില്‍ ചേരുന്നതിനനുസരിച്ച് പദ്ധതി തുടര്‍ച്ചയായി വിപുലീകരിക്കും. സര്‍ക്കാര്‍ ഏജന്‍സികള്‍, വിമാനത്താവളങ്ങള്‍, ക്രെഡിറ്റ് ബ്യൂറോകളും ബാങ്കുകളും പോലുള്ള സ്ഥാപനങ്ങള്‍ നടത്തുന്ന ഡിജിറ്റല്‍ സംവിധാനങ്ങള്‍ എന്നിവ തമ്മിലുള്ള സംയോജനത്തിലൂടെ വിസ ഇഷ്യൂ ചെയ്യല്‍ പ്രക്രിയ പൂര്‍ണമായും ഓട്ടോമേറ്റ് ചെയ്യാനാണ് വിസ ബൈ പ്രൊഫൈല്‍ സംരംഭം രൂപകല്‍പ്പന ചെയ്തിരിക്കുന്നത്.
വിസ ബൈ പ്രൊഫൈല്‍ സംരംഭം എന്നാല്‍ അവസരങ്ങള്‍, മൊബിലിറ്റി, കണക്റ്റിവിറ്റി എന്നിവയിലേക്കുള്ള പ്രവേശനം എന്നാണ് അര്‍ഥമാക്കുന്നതെന്ന് സൗദി ടൂറിസം മന്ത്രിയും ടൂറൈസ് ഡയറക്ടര്‍ ബോര്‍ഡ് ചെയര്‍മാനുമായ അഹ്മദ് അല്‍ഖത്തീബ് പറഞ്ഞു. ധനകാര്യ സ്ഥാപനങ്ങളും ടൂറിസം സ്ഥാപനങ്ങളും തമ്മിലുള്ള ശ്രമങ്ങള്‍ ഏകീകരിക്കുന്നതിലൂടെ, നടപടിക്രമങ്ങള്‍ ലളിതമാക്കുകയും വിശാലമായ തോതില്‍ ആക്സസ് വികസിപ്പിക്കുകയും ചെയ്യുന്ന ആഗോള യാത്രക്കായി ഞങ്ങള്‍ കൂടുതല്‍ സ്മാര്‍ട്ട് ആയ ഒരു ചട്ടക്കൂട് നിര്‍മ്മിക്കുകയാണ്. രാജ്യങ്ങള്‍ ആളുകളുടെ ചലനം എങ്ങനെ സുഗമമാക്കുന്നു എന്നതിലെ അടിസ്ഥാനപരമായ മാറ്റത്തെ ഈ സംരംഭം പ്രതിനിധീകരിക്കുന്നു. ഇത് ലോകമെമ്പാടുമുള്ള യാത്രക്കാരെ കൂടുതല്‍ കാര്യക്ഷമമായ സംവിധാനങ്ങളിലേക്കും കൂടുതല്‍ വഴക്കമുള്ള അനുഭവത്തിലേക്കും നയിക്കുന്നതായും അഹ്മദ് അല്‍ഖത്തീബ് പറഞ്ഞു.
പങ്കാളിത്തം വഹിക്കുന്ന ബാങ്കുകളെയും വിസ കമ്പനിയെയും സംയോജിപ്പിച്ച് യോഗ്യരായ വിസ ക്രെഡിറ്റ് കാര്‍ഡുകള്‍ കൈവശമുള്ള സന്ദര്‍ശകരുടെ സൗദിയിലേക്കുള്ള വരവ് സുഗമമാക്കാനാണ് ഈ മുന്‍നിര സംരംഭം ആരംഭിച്ചതെന്ന് ഡെപ്യൂട്ടി വിദേശ മന്ത്രി എന്‍ജിനീയര്‍ വലീദ് അല്‍ഖുറൈജി പറഞ്ഞു. ആഗോളതലത്തില്‍ ടൂറിസവും സന്ദര്‍ശക പ്രവേശനവും പ്രോത്സാഹിപ്പിക്കാനുള്ള സൗദി അറേബ്യയുടെ തുടര്‍ച്ചയായ ശ്രമങ്ങളുടെ ഭാഗമായാണ് ആഗോളതലത്തിലെ മുന്‍നിര പദ്ധതി നടപ്പാക്കുന്നത്. നടപടിക്രമങ്ങള്‍ സുഗമമാക്കുന്നതിലൂടെ മുന്‍നിര ആഗോള വിനോദസഞ്ചാര കേന്ദ്രമെന്ന നിലയില്‍ സൗദി അറേബ്യയുടെ സ്ഥാനം ഇത് ശക്തിപ്പെടുത്തുമെന്നും എന്‍ജിനീയര്‍ വലീദ് അല്‍ഖുറൈജി പറഞ്ഞു.