റിയാദ്: ഹരിത രാഷ്ട്രീയ പ്രസ്ഥാനത്തെയും ആശയത്തെയും ക്രിയാത്മകമായി തന്റെ ജീവിതത്തിലുടനീളം ചേര്‍ത്ത് പിടിച്ച നേതാവായിരുന്നു സക്കറിയ വാടാനപ്പള്ളിയെന്ന് സൗദി റിയാദ് കെ.എം.സി.സി തൃശൂര്‍ ജില്ല കമ്മറ്റി സംഘടിപ്പിച്ച അനുസ്മരണ യോഗം അഭിപ്രായപ്പെട്ടു. കെ.എം.സി.സി ഓഡിറ്റോറിയത്തില്‍ സംഘടിപ്പിച്ച അനുസ്മരണ യോഗത്തില്‍ ജില്ലാ പ്രസിഡന്റ് മുഹമ്മദ് കുട്ടി ചേലക്കര അധ്യക്ഷത വഹിച്ചു. സെന്‍ട്രല്‍ കമ്മറ്റി വൈസ് പ്രസിഡന്റ് കബീര്‍ വൈലത്തൂര്‍ ഉദ്ഘാടനം ചെയ്തു.
രണ്ട് പതിറ്റാണ്ടിലേറെ റിയാദിലുണ്ടായിരുന്ന അദ്ദേഹം ജില്ല കമ്മിറ്റിയുടെ സീനിയര്‍ വൈസ് പ്രസിഡന്റായി കെ.എം.സി.സിയെ കെട്ടിപ്പടുക്കുന്നതില്‍ നിര്‍ണായക പങ്കുവഹിക്കുകയും കാര്‍ക്കശ്യമായ നിലപാടുകളിലൂടെ തന്റെ ആശയത്തെ മുന്നോട്ട് നയിക്കുകയും പ്രസിന്ധികളെ തരണം ചെയ്തും പാവങ്ങളെ ചേര്‍ത്ത് പിടിക്കുകയും കമ്മറ്റിക്ക് മാര്‍ഗ നിര്‍ദേശങ്ങള്‍ നല്‍കുകയും ഹരിത രാഷ്ട്രീയത്തെ നെഞ്ചോട് ചേര്‍ത്ത് പിടിച്ച പ്രിയപ്പെട്ട നേതാവായിരുന്നു സക്കറിയയെന്ന് യോഗത്തില്‍ സംസാരിച്ചവര്‍ പറഞ്ഞു.
സെന്‍ട്രല്‍ കമ്മറ്റി ഓര്‍ഗനൈസിങ് സെക്രട്ടറി സത്താര്‍ താമരത്ത് മുഖ്യ പ്രഭാഷണം നടത്തി. അബ്ദുല്‍ ഖാദര്‍ വെണ്‍മെനാട്, ഉമര്‍ ചളിങ്ങാട്, നിസാര്‍ മരതയൂര്‍, തുടങ്ങിയവര്‍ സംസാരിച്ചു. ജില്ലാ ജന സെക്രട്ടറി അന്‍ഷാദ് കയ്പമംഗലം സ്വാഗതവും, ജില്ലാ ട്രഷറര്‍ മുഹമ്മദ് ഷാഫി കല്ലിങ്ങല്‍ നന്ദിയും പറഞ്ഞു. ഷംസുദ്ദീന്‍ ഖിറാഅത്ത് നടത്തി. ജില്ലാ ഭാരവാഹികളായ ബഷീര്‍ ചെറുവത്താണി, ഷാഹിദ് അറക്കല്‍, ഹിജാസ് തിരുനെല്ലൂര്‍, സുബൈര്‍ ഒരുമനയൂര്‍, മുഹമ്മദ് സ്വാലിഹ് അന്തിക്കാട് എന്നിവര്‍ നേതൃത്വം നല്‍കി.