റിയാദ് – സര്‍വീസ് ആരംഭിച്ച് ഒരു വര്‍ഷത്തിനുള്ളില്‍ റിയാദ് മെട്രോ യാത്രക്കാരുടെ എണ്ണം 15 കോടി കവിഞ്ഞു. ഏറ്റവും കൂടുതല്‍ യാത്രക്കാര്‍ ഉപയോഗിച്ച മെട്രോ സ്‌റ്റേഷന്‍ ഖസ്ര്‍ അല്‍ഹുകും സ്‌റ്റേഷനാണ്. ഒരു വര്‍ഷത്തിനിടെ ഈ സ്‌റ്റേഷന്‍ ഒന്നേകാല്‍ കോടിയിലേറെ യാത്രക്കാരാണ് ഉപയോഗിച്ചത്. മെട്രോ തലസ്ഥാന നഗരിയുടെ പൊതുഗതാഗത മേഖലയില്‍ ഗണ്യമായ സ്വാധീനം ചെലുത്തി. മെട്രോയും ബസ് സര്‍വീസുകളും അടങ്ങിയ റിയാദ് പൊതുഗതാഗത ശൃംഖല ഒരു വര്‍ഷത്തിനിടെ 26 കോടിയിലേറെ യാത്രക്കാര്‍ക്ക് സേവനം നല്‍കിയതായി സ്ഥിതിവിവരക്കണക്കുകള്‍ വ്യക്തമാക്കുന്നു. ബസ് സര്‍വീസുകള്‍ 11 കോടി പേര്‍ ഉപയോഗപ്പെടുത്തി.
ഒരു വര്‍ഷത്തിനിടെ റിയാദ് മെട്രോ ട്രെയിനുകള്‍ ആറു ലൈനുകളില്‍ ആകെ 2.6 കോടിയിലേറെ കിലോമീറ്റര്‍ സഞ്ചരിച്ചു. ഏകദേശം ഒമ്പതു ലക്ഷം സര്‍വീസുകളാണ് നടത്തിയത്. മെട്രോ സര്‍വീസ് സമയനിഷ്ഠ നിരക്ക് 99.7 ശതമാനമാണ്. ഇത് മെട്രോയുടെ പ്രവര്‍ത്തന കാര്യക്ഷമതയും സേവന സ്ഥിരതയും സ്ഥിരീകരിക്കുന്നു. യാത്രക്കാരില്‍ 50 ശതമാനവും ജോലി ആവശ്യങ്ങള്‍ക്കായാണ് റിയാദ് പൊതുഗതാഗത ശൃംഖല ഉപയോഗിക്കുന്നത്. 65 വകുപ്പുകളും സ്ഥാപനങ്ങളും തങ്ങളുടെ ജീവനക്കാര്‍ക്കായി പൊതുഗതാഗത ശൃംഖല സേവനങ്ങള്‍ ഉപയോഗിക്കുന്നതായും ഡാറ്റകള്‍ വെളിപ്പെടുത്തുന്നു. അതിവേഗം വികസിച്ചുകൊണ്ടിരിക്കുന്ന നഗരത്തില്‍ ഗതാഗത അടിസ്ഥാന സൗകര്യങ്ങള്‍ വികസിപ്പിക്കാനും ജീവിത നിലവാരം മെച്ചപ്പെടുത്താനും സുസ്ഥിരമായ ചലനം സാധ്യമാക്കാനുമുള്ള ശ്രമങ്ങളുടെ ഭാഗമായി റിയാദ് നഗരം സാക്ഷ്യം വഹിക്കുന്ന പരിവര്‍ത്തനങ്ങളെ ഈ കണക്കുകള്‍ എടുത്തുകാണിക്കുന്നുണ്ട്.