റിയാദ്: ക്രിമിനല്‍ സ്വഭാവമില്ലാത്ത കേസുകളില്‍ പെട്ട് പിഴയടക്കാന്‍ പണമില്ലാതെ ദീര്‍ഘകാലമായി സൗദി ജയിലുകളില്‍ കഴിയുന്നവരെ മോചിതരാക്കാന്‍ എന്‍.ആര്‍.കെ. ഫോറം മുന്‍കൈ എടുക്കുമെന്ന് റിയാദിലെ മുഖ്യധാരാ പ്രവാസി സംഘടനകളുടെ കോര്‍ഡിനേഷന്‍ കമ്മിറ്റിയായ എന്‍. ആര്‍. കെ. ഫോറം ഭാരവാഹികള്‍ പറഞ്ഞു. പുന:സംഘടിപ്പിക്കപ്പെട്ട എന്‍. ആര്‍. കെ ഫോറത്തിന്റെ പ്രവര്‍ത്തനോദ്ഘാടന യോഗത്തില്‍ സംസാരിക്കുകയായിരുന്നു നേതാക്കള്‍. ഇത്തരം പ്രവര്‍ത്തനങ്ങള്‍ ഏറ്റെടുക്കുന്നതിനുള്ള ധന:സമാഹരണത്തിനായി ബിരിയാണി ചലഞ്ച്, കേരളോത്സവം പോലുള്ള പരിപാടികള്‍ സംഘടിപ്പിക്കുമെന്നും ചെയര്‍മാന്‍ സി.പി മുസ്തഫ പറഞ്ഞു.
എന്‍. ആര്‍. കെ ഫോറത്തിന്റെ പ്രഥമ ചെയര്‍മാന്‍ ഐ. പി. ഉസ്മാന്‍ കോയ പ്രവര്‍ത്തനോദ്ഘാടനം നിര്‍വ്വഹിച്ചു. ജനറല്‍ കണ്‍വീനര്‍ സുരേന്ദ്രന്‍ കൂട്ടായി സ്വാഗതം പറഞ്ഞു. ഫോറത്തിന്റെ മുന്‍ ചെയര്‍മാന്‍ അയ്യൂബ് ഖാന്‍ വിഴിഞ്ഞം, ലോക കേരള സഭ അംഗങ്ങളായ കെ.പി.എം. സാദിഖ്, ഇബ്രാഹിം സുബ്ഹാന്‍, പ്രവാസി ഭാരതീയ പുരസ്‌കാര ജേതാവ് ശിഹാബ് കൊട്ടുകാട്, റിയാദ് ഇന്ത്യന്‍ എംബസി ഉദ്യോഗസ്ഥന്‍ പുഷ്പരാജ്, സത്താര്‍ താമരത്ത് (കെ. എം. സി. സി), സുരേഷ് കണ്ണപുരം (കേളി), അബ്ദുല്ല വല്ലാഞ്ചിറ, ബാലു കുട്ടന്‍ (ഒ. ഐ. സി. സി) തുടങ്ങിയവര്‍ പ്രസംഗിച്ചു.
ഇന്ത്യന്‍ എംബസി വെല്‍ഫെയര്‍ ഉദ്യോഗസ്ഥനായി വിരമിച്ച് നാട്ടിലേക്ക് മടങ്ങുന്ന യൂസഫ് കാക്കഞ്ചേരിക്ക് യാത്രയയപ്പ് നല്‍കി. യൂസഫ് കാക്കഞ്ചേരി മലയാളി സമൂഹത്തിന് നല്‍കിയ സേവനങ്ങള്‍ അനുസ്മരിച്ച് സിദ്ദീഖ് തുവ്വൂര്‍ സംസാരിച്ചു. സി. പി. മുസ്തഫ, സുരേന്ദ്രന്‍ കൂട്ടായി, യഹ്യ കൊടുങ്ങല്ലൂര്‍ എന്നിവര്‍ മെമെന്റോ നല്‍കി. കേളി കലാസംസ്‌കാരിക വേദിക്ക് വേണ്ടി സെക്രട്ടറി സുരേഷ് കണ്ണപുരവും പ്രസിഡന്റ് സെബിന്‍ ഇഖ്ബാലും, ഫ്രണ്ട്‌സ് ഓഫ് കേരളക്ക് വേണ്ടി ഗഫൂര്‍ കൊയിലാണ്ടിയും, പയ്യന്നൂര്‍ സൗഹൃദ വേദിക്ക് വേണ്ടി സനൂപ് പയ്യന്നൂരും പൊന്നാട അണിയിച്ചു.
മുഖ്യധാരാ സംഘടനകള്‍ ഒരുമിച്ച് നിന്നാല്‍ റിയാദിലെ മലയാളി സമൂഹത്തിന് വേണ്ടി നിരവധി കാര്യങ്ങള്‍ ചെയ്യാനാവും എന്നതിന് ഏറ്റവും വലിയ ഉദാഹരണമാണ് വധശിക്ഷക്ക് വിധിക്കപ്പെട്ട് ജയിലില്‍ കഴിയുന്ന അബ്ദുറഹീമിന്റെ ജയില്‍ മോചനത്തിന് വേണ്ടിയുള്ള പ്രവര്‍ത്തനങ്ങള്‍ എന്നും മലയാളി സമൂഹത്തിന് കൂടുതല്‍ സഹായകരമായ രീതിയില്‍ പ്രവര്‍ത്തിക്കാന്‍ മലയാളി സംഘടനകളുടെ പൊതു വേദിയായ എന്‍. ആര്‍. കെ. ഫോറത്തിന് കഴിയട്ടെ എന്നും യാത്രയയപ്പിന് നന്ദി പറഞ്ഞു യൂസഫ് കാക്കഞ്ചേരി പറഞ്ഞു. എന്‍. ആര്‍. കെ. ഫോറത്തിന്റെ പുതിയ ലോഗോ പ്രകാശനം ചെയ്തു. ആക്റ്റിംഗ് ട്രഷറര്‍ യഹ്യ കൊടുങ്ങല്ലൂര്‍ നന്ദി പറഞ്ഞു.