ബുറൈദ – അല്‍ഖസീം പ്രവിശ്യയില്‍ പെട്ട അല്‍ഹാറ മരുഭൂമിയില്‍ പത്തു ദിവസം മുമ്പ് വഴിതെറ്റി കാണാതായ സൗദി യുവാവ് സുലൈമാന്‍ അല്‍ജബറിനെ മരിച്ച നിലയില്‍ കണ്ടെത്തി. സുലൈമാന്‍ അല്‍ജബറുമായുള്ള ഫോണ്‍ ബന്ധം മുറിഞ്ഞതായി കഴിഞ്ഞ മാസം 24 ന് ആണ് കുടുംബം സുരക്ഷാ വകുപ്പുകളെയും മരുഭൂമിയില്‍ കാണാതാകുന്നവര്‍ക്കു വേണ്ടി തിരച്ചിലുകളും രക്ഷാപ്രവര്‍ത്തനങ്ങളും നടത്തുന്ന വളണ്ടിയര്‍ സംഘത്തെയും അറിയിച്ചത്.
തുടര്‍ന്ന് നടത്തിയ ഊര്‍ജിതമായ തിരച്ചിലുകളില്‍ കഴിഞ്ഞ വെള്ളിയാഴ്ച യുവാവിന്റെ പുതിയ മോഡല്‍ കാര്‍ മരുഭൂമിയില്‍ കണ്ടെത്തി. കാറിനു സമീപമുള്ള പ്രദേശങ്ങള്‍ കേന്ദ്രീകരിച്ച് നടത്തിയ തിരച്ചിലുകളിലൂടെ മരുഭൂമിയില്‍ മരിച്ചുകിടക്കുന്ന നിലയില്‍ സുലൈമാന്‍ അല്‍ജബറിനെ പിന്നീട് കണ്ടെത്തുകയായിരുന്നു. മരുഭൂമിയില്‍ കൊടും ചൂടില്‍ വെള്ളവും ഭക്ഷണവുമില്ലാതെ യുവാവ് തളര്‍ന്നുവീണ് മരിക്കുകയായിരുന്നു.