റിയാദ്- റിയാദ് കെഎംസിസി മങ്കട മണ്ഡലം കമ്മിറ്റിയുടെ ദ ഐം ക്യാമ്പയിന്‍ ലോഗോ പ്രകാശനം ബതഹ്‌യിലെ നൂര്‍ ഓഡിറ്റോറിയത്തില്‍ നടന്ന ചടങ്ങില്‍ റിയാദ് കെഎംസിസി സെന്‍ട്രല്‍ കമ്മിറ്റി പ്രസിഡന്റ് സിപി മുസ്തഫ നിര്‍വഹിച്ചു. ‘ഫോര്‍വേഡ് ടുഗതര്‍’ എന്ന പ്രമേയത്തില്‍ ഒരു വര്‍ഷം നീണ്ടുനില്‍ക്കുന്ന പരിപാടിയില്‍ പ്രവര്‍ത്തകരെ സജീവമായി സംഘടന രംഗത്തേക്ക് കൊണ്ട് വരിക എന്ന ലക്ഷ്യത്തോടെയാണ് മണ്ഡലം കമ്മിറ്റി ദ ഐം കാമ്പയിന്‍ സംഘടിപ്പിക്കുന്നത്.
കെഎംസിസി റിയാദ് മലപ്പുറം ജില്ലാ കമ്മിറ്റി പ്രസിഡന്റ് ഷൗക്കത്ത് കടമ്പോട്ട് കാമ്പയിന്‍ പ്രഖ്യാപന സമ്മേളനം ഉദ്ഘാടനം ചെയ്തു. മണ്ഡലം പ്രസിഡന്റ് നജ്മുദ്ദീന്‍ മഞ്ഞളാംകുഴി അധ്യക്ഷത വഹിച്ചു. സെന്‍ട്രല്‍ കമ്മിറ്റി ജനറല്‍ സെക്രട്ടറി ഷുഹൈബ് പനങ്ങാങ്ങര, വൈസ് പ്രസിഡന്റ് അസീസ് വെങ്കിട്ട സംസാരിച്ചു.
ജൂലൈ അവസാന വാരത്തില്‍ തുടങ്ങുന്ന ക്യാമ്പയിന്‍ പ്രവര്‍ത്തനങ്ങളില്‍ ഭാഷാ അനുസ്മരണം, ക്വിസ് മത്സരം, സ്വാതന്ത്ര്യ ദിനാഘോഷം, സ്‌പോര്‍ട്‌സ് മീറ്റ്, നേതൃ സ്മൃതി, കേരളപ്പിറവി ദിനാഘോഷം, മാപ്പിളപ്പാട്ട് മത്സരം, നസ്വീഹത് ക്യാമ്പ്, മെഡിക്കല്‍ ക്യാമ്പ്, കരിയര്‍ ഗൈഡന്‍സ്, ഫാമിലി മീറ്റ്, കമ്മ്യൂണിക്കേഷന്‍ സ്‌കില്‍(ദ ആര്‍ട് ഓഫ് സ്പീച്ച്) തുടങ്ങി വ്യത്യസ്ത പരിപാടികള്‍ നടത്തും. കാമ്പയിനിലെ സ്‌പോര്‍ട്‌സിതര മത്സര പരിപാടികളില്‍ ഒന്നാം സ്ഥാനം ലഭിക്കുന്നവര്‍ക്ക് സ്വര്‍ണ്ണ കോയിന്‍ സമ്മാനമായി നല്‍കാനും തീരുമാനിച്ചു.