റിയാദ് : കേളി കലാസാംസ്‌കാരിക വേദിയുടെ ഇരുപത്തിനാലാമത് വാര്‍ഷികാഘോഷം സമാപിച്ചു. കേളിയുടെയും കേളി കുടുംബ വേദിയുടേയും കലാകാരന്മാര്‍ ഒരുക്കിയ ആനുകാലിക പ്രസക്തിയുള്ള കലാ പ്രകടനങ്ങള്‍ വേറിട്ട അനുഭവമായി. കൃഷ്ണകുമാര്‍ ആലപിച്ച കേരളം എന്ന് തുടങ്ങുന്ന ഗാനത്തോടെ ആരംഭിച്ച പരിപാടി രാത്രി 11 മണിവരെ നീണ്ടു. സിംഗിള്‍ ഡാന്‍സ്, ഗ്രൂപ്പ് ഡാന്‍സ്, കുട്ടികളുടെ സിനിമാറ്റിക് ഡാന്‍സ്, ഒപ്പന, മാര്‍ഗം കളി, നാടകം, സ്‌കിറ്റ്, വിപ്ലവ ഗാനം, സംഘഗാനം, സൂഫി ഡാന്‍സ്, വില്‍ കലാമേള, ക്ലാസിക്കല്‍ ഡാന്‍സ്, വഞ്ചിപ്പാട്ട്, കോല്‍ക്കളി, ദഫ് മുട്ട്, നാടന്‍ പാട്ട്, സ്‌കേറ്റിംഗ് ഷോ തുടങ്ങീ നാട്ടിലെ കലോത്സവ വേദിയെ അനുസ്മരിപ്പിക്കുന്ന തരത്തില്‍ 49 പരിപാടികള്‍ അരങ്ങേറി.
42 കലാകാരന്മാര്‍ അണിനിരന്ന ഒപ്പനയും നവോത്ഥാന മുന്നേറ്റത്തെ ഓര്‍മ്മിപ്പിക്കുന്ന ചണ്ഡാലഭിക്ഷുകിയും ഒന്നിനൊന്ന് മികച്ച പ്രകടനം കാഴ്ചവെച്ചു.
കുട്ടികളുടെ പ്രകടനങ്ങള്‍ ആരെയും അതിശയിപ്പിക്കുന്ന തരത്തിലായിരുന്നു. നാട്ടില്‍ നിന്നും ജോലിക്കായെത്തി 12ഉം 14ഉം മണിക്കൂര്‍ ജോലി ചെയ്തതിന് ശേഷം കിട്ടുന്ന സമയങ്ങളില്‍ പരിശീലനം നടത്തി കലാകാരന്മാര്‍ അവതരിപ്പിച്ച ഓരോ പരിപാടിയും യഥാര്‍ത്ഥ കലാകാരന്‍മാരോട് കിടപിടിക്കുന്ന തരത്തിലായി. കുടുംബ വേദിയിലെ വനിതകള്‍ അവതരിപ്പിച്ച പരിപാടികള്‍ പ്രമേയം കൊണ്ടും പ്രകടനം കൊണ്ടും വ്യത്യസ്തത പുലര്‍ത്തി. സ്ത്രീത്വത്തിന്റെ ബഹുമുഖമായ യാത്രകളെ പ്രമേയമാക്കി അനാമികരാജിന്റെ നേതൃത്വത്തില്‍ നടത്തിയ തീം ഡാന്‍സ് നിറഞ്ഞ കയ്യടിയോടെയാണ് സദസ്സ് സ്വീകരിച്ചത്.
വൈകിട്ട് ആറുമണിയോടെ ആരംഭിച്ച സാംസ്‌കാരിക സമ്മേളനം ഇന്ത്യന്‍ എംബസി സെക്കന്റ് സെക്രട്ടറി എസ് കെ നായക് ഉദ്ഘാടനം ചെയ്തു. ഡ്യൂണ്‍സ് സ്‌കൂള്‍ പ്രിന്‍സിപ്പല്‍ സംഗീത അനൂപ് മുഖ്യ പ്രഭാഷണം നടത്തി. ‘കിത്താബ്’ ദി ബാന്‍ഡ് ഓഫ് ഹാര്‍മണി എന്ന പുതിയ ഗാനമേള ടീം ഒരുക്കിയ മികവാര്‍ന്ന ഗാന വിരുന്ന് സമാപനത്തിന് കൊഴുപ്പേകി. സുഹൈബ് മലകര്‍, തഷിന്‍, രഞ്ജിത്ത്, ശബാന അന്‍ഷാദ്, അക്ഷയ് സുധീര്‍, അഞ്ജലി സുധീര്‍ എന്നിവര്‍ ഗാനമേളക്ക് നേതൃത്വം നല്‍കി.
കേളിയുടെ 24 വര്‍ഷത്തെ ചരിത്രം വിളിച്ചോതുന്ന ചിത്രപ്രദര്‍ശനത്തിന് സുകേഷ് കുമാര്‍ നേതൃത്വം നല്‍കി. പ്രോഗ്രാം കമ്മറ്റി കണ്‍വീനറായി ഫൈസല്‍ കൊണ്ടോട്ടിയും, ചുമതലക്കാരനായി സാംസ്‌കാരിക കമ്മറ്റി കണ്‍വീനര്‍ ഷാജി റസാക്കും പ്രവര്‍ത്തിച്ചു. പബ്ലിസിറ്റി കണ്‍വീനറായി ബിജു തായമ്പത്ത്, വളണ്ടിയര്‍ ക്യാപ്റ്റനായി ഗഫൂര്‍ ആനമങ്ങാട്, സ്റ്റേജ് ആന്‍ഡ് ഡെക്കറേഷന്‍ കണ്‍വീനറായി റിയാസ് പള്ളാട്ട്, സാമ്പത്തികം സുനില്‍ സുകുമാരന്‍, കരീം പൈങ്ങാട്ടൂര്‍, ഭക്ഷണം ഗതാഗതം കിഷോര്‍ ഇ നിസാം എന്നിവരും പ്രവര്‍ത്തിച്ചു. സ്റ്റേജ് & ഡക്കറേഷന്‍ ചുമതലക്കാരനായി മധു ബാലശ്ശേരി, ഭക്ഷണ കമ്മിറ്റി ചുമതലക്കാരനായി ഹാരിസ് നസീം എന്നിവരും പ്രവര്‍ത്തിച്ചു. സംഘാടക സമിതി വൈസ് ചെയര്‍മാന്‍ നൗഫല്‍ സിദ്ദീക്ക്, വൈസ് ചെയര്‍പേഴ്‌സണ്‍ ശ്രീഷ സുകേഷ്, സംഘാടക സമിതി ജോയിന്റ് കണ്‍വീനര്‍ റഫീക്ക് പാലത്ത് എന്നിവരോടൊപ്പം കേളി കേന്ദ്ര കമ്മറ്റി അംഗങ്ങള്‍, കേളി അംഗങ്ങള്‍, കുടുംബവേദി അംഗങ്ങള്‍ എന്നിവരും കേളി 2025 ന്റെ വിജയത്തിനായി പ്രവര്‍ത്തിച്ചു. സംഘാടക സമിതി ചെയര്‍മാന്‍ രജീഷ് പിണറായി സ്വാഗതവും കണ്‍വീനര്‍ റഫീക് ചാലിയം നന്ദിയും പറഞ്ഞു.