ജിദ്ദ- അഞ്ചുവർഷത്തെ സേവനത്തിന് ശേഷം ജിദ്ദ ഇന്റര്‍നാഷണല്‍ ഇന്ത്യന്‍ സ്‌കൂള്‍ പ്രിന്‍സിപ്പല്‍ ഡോ. മുസഫര്‍ ഹസന്‍ പ്രിന്‍സിപ്പല്‍ സ്ഥാനം ഒഴിയുന്നു. പ്രിന്‍സിപ്പല്‍ പദവി ഈ അക്കാദമിക് വര്‍ഷാവനസാനത്തോടെ ഒഴിയുകയാണെന്ന് മുസഫർ ഹസൻ അറിയിച്ചു. ജിദ്ദയിലെ ഗുഡ്ഹോപ്പ് അക്കാദമിയുടെ കോഴ്സ് ഡയറക്ടറായാണ് പുതിയ ചുമതല.
അഞ്ചു വര്‍ഷക്കാലത്തെ സേവനം മികവുറ്റതാക്കാന്‍ സഹകരിച്ച എല്ലാവര്‍ക്കും ഏറെ നന്ദിയും കടപ്പാടും ഉണ്ടെന്നും തുടര്‍ന്നും ഏതു കാര്യത്തിനും തന്നെ സമീപിക്കാമെന്നും അദ്ദേഹം പറഞ്ഞു. കുട്ടികളുമായി കളിച്ചും ചിരിച്ചും ശാസിച്ചും അധ്യാപനങ്ങള്‍ നല്‍കിയും അവരൊടൊപ്പം ചെലവഴിക്കാന്‍ കഴിഞ്ഞ ഓരോ നിമിഷങ്ങളും ജീവിതത്തിലെ ഏറ്റവും വിലപ്പെട്ട നിമിഷങ്ങളായാണ് കരുതുന്നത്. ഏറ്റവും മികച്ച സ്‌കൂളിനുള്ള ഇന്ത്യ മിഡില്‍ ഈസ്റ്റ് എജുക്കേഷന്‍ അവാര്‍ഡ് 2023 ജിദ്ദ സ്‌കൂളിന് നേടിയെടുക്കാൻ സാധിച്ചതിൽ ഏറെ അഭിമാനമുണ്ടെന്നും അദ്ദേഹം കൂട്ടിച്ചേര്‍ത്തു. ജിദ്ദ സ്‌കൂളില്‍ പുതിയ പ്രിന്‍സിപ്പല്‍ താമസിയാതെ ചുമതലയേല്‍ക്കും.