ജിദ്ദ – ഒരാഴ്ചക്കിടെ സൗദിയില് നിന്ന് 13,646 നിയമ ലംഘകരെ നാടുകടത്തിയതായി ആഭ്യന്തര മന്ത്രാലയം അറിയിച്ചു. ഈ മാസം 16 മുതല് 22 വരെയുള്ള ദിവസങ്ങളിലാണ് വിവിധ പ്രവിശ്യകളിലെ ഡീപോര്ട്ടേഷന് സെന്ററുകളില് നിന്ന് ഇത്രയും പേരെ നാടുകടത്തിയത്. ഒരാഴ്ചക്കിടെ വിവിധ പ്രവിശ്യകളില് സുരക്ഷാ വകുപ്പുകള് നടത്തിയ റെയ്ഡുകളില് 10,662 ഇഖാമ നിയമ ലംഘകരും 4,147 നുഴഞ്ഞുകയറ്റക്കാരും 2,221 തൊഴില് നിയമ ലംഘകരും അടക്കം ആകെ 17,030 പേര് പിടിയിലായി.
ഇക്കാലയളവില് അതിര്ത്തികള് വഴി രാജ്യത്ത് നുഴഞ്ഞുകയറാന് ശ്രമിച്ച 1,119 പേരും പിടിയിലായി. ഇക്കൂട്ടത്തില് 27 ശതമാനം പേര് യെമനികളും 71 ശതമാനം പേര് എത്യോപ്യക്കാരും രണ്ടു ശതമാനം പേര് മറ്റു രാജ്യക്കാരുമാണ്. അതിര്ത്തികള് വഴി അനധികൃത രീതിയില് രാജ്യം വിടാന് ശ്രമിച്ച 65 പേരും ഇഖാമ, തൊഴില് നിയമ ലംഘകര്ക്കും നുഴഞ്ഞുകയറ്റക്കാര്ക്കും താമസ, യാത്രാ സൗകര്യങ്ങളും ജോലിയും നല്കിയ 17 പേരും അറസ്റ്റിലായി. വിവിധ പ്രവിശ്യകളിലെ ഡീപോര്ട്ടേഷന് സെന്ററുകളില് കഴിയുന്ന 1,483 സ്ത്രീകള് അടക്കം 41,142 നിയമ ലംഘകര്ക്കെതിരെ നിലവില് നിയമാനുസൃത നടപടികള് സ്വീകരിച്ചുവരികയാണ്.
സ്വദേശങ്ങളിലേക്ക് തിരിച്ചയക്കുന്നതിനു മുന്നോടിയായി പാസ്പോര്ട്ടുകളില്ലാത്ത 33,255 പേര്ക്ക് താല്ക്കാലിക യാത്രാ രേഖകള് സംഘടിപ്പിക്കാന് എംബസികളുമായും കോണ്സുലേറ്റുകളുമായും സഹകരിക്കുന്നു. 1,945 പേര്ക്ക് മടക്കയാത്രാ ടിക്കറ്റുകള് ബുക്ക് ചെയ്യാന് നടപടികള് സ്വീകരിക്കുന്നതായും ആഭ്യന്തര മന്ത്രാലയം അറിയിച്ചു.