ഇരുമ്പ് ഉപകരണങ്ങൾക്കുള്ളിൽ 36,33,978 ലഹരി ഗുളികകള്‍, ജിദ്ദയിൽ വൻ മയക്കുമരുന്ന് വേട്ട

ജിദ്ദ – ജിദ്ദ തുറമുഖത്ത് സകാത്ത്, ടാക്‌സ് ആന്റ് കസ്റ്റംസ് അതോറിറ്റിയുടെ വന്‍ മയക്കുമരുന്ന് വേട്ട. ജിദ്ദ തുറമുഖം വഴി ഇറക്കുമതി ചെയ്ത ഇരുമ്പ് ഉപകരണങ്ങള്‍ക്കകത്ത് ഒളിപ്പിച്ച് വിദേശത്തു നിന്ന് കടത്താന്‍ ശ്രമിച്ച 36,33,978 ലഹരി ഗുളികകള്‍ അതോറിറ്റി പിടികൂടി.

സുരക്ഷാ സാങ്കേതികവിദ്യകളും പോലീസ് നായ്ക്കളെയും ഉപയോഗിച്ച് നടത്തിയ പരിശോധനയിലാണ് ഉപകരണങ്ങള്‍ക്കകത്ത് അതിവിദഗ്ധമായി ഒളിപ്പിച്ച നിലയില്‍ മയക്കുമരുന്ന് ശേഖരം കണ്ടെത്തിയത്. മയക്കുമരുന്ന് ശേഖരം കണ്ടെത്തിയ ശേഷം ജനറല്‍ ഡയറക്ടറേറ്റ് ഓഫ് നാര്‍കോട്ടിക്‌സ് കണ്‍ട്രോളുമായി ഏകോപനം നടത്തി, മയക്കുമരുന്ന് ശേഖരം സൗദിയില്‍ സ്വീകരിച്ച രണ്ടു പേരെ അറസ്റ്റ് ചെയ്തതായും സകാത്ത്, ടാക്‌സ് ആന്റ് കസ്റ്റംസ് അതോറിറ്റി അറിയിച്ചു.