ജിദ്ദ- കഴിഞ്ഞ ദിവസം ജിദ്ദ സീസണിനോടനുബന്ധിച്ച് നടത്തിയ ഇന്ത്യാ ഫെസ്റ്റിൽ മലയാളി റാപ്പ് ഗായകൻ ഡെബ്സി നടത്തിയ പരിപാടിക്കെതിരെ പ്രവാസികൾക്കിടയിൽനിന്ന് കടുത്ത വിമർശനം. ജിദ്ദ ഫെസ്റ്റിൽ അന്നേ ദിവസം നടന്ന മറ്റു പരിപാടികളുടെ ശോഭ കെടുത്തുന്നതായിരുന്നു ഡെബ്സിയുടെ പ്രോഗ്രാം എന്നതാണ് വിമർശനത്തിന്റെ കാതൽ. ഇന്ത്യയിലെ പ്രമുഖ യുവ ഗായകനും റിയാലിറ്റി ഷോ വിന്നറുമായ സൽമാൻ അലിയുടെ ഗാനങ്ങൾക്ക് ശേഷം, അവസാനത്തെ ഇനമായിരുന്നു ഡബ്സിയുടെ പരിപാടി. അതേസമയം, ഡബ്സിയെ കാത്തിരുന്ന മലയാളികൾ അടക്കമുള്ള കലാപ്രേമികൾക്ക് നിരാശ നൽകിയാണ് ഡബ്സി മടങ്ങിയത് എന്നാണ് പ്രവാസികൾ ആരോപിക്കുന്നത്.
ഡബ്സിക്ക് വേണ്ടി കാണികൾക്കിടയിൽനിന്ന് നേരത്തെ തന്നെ മുറവിളി ഉയർന്നിരുന്നു. പ്രോഗ്രാമിലെ അവസാന ഇനം ഡബ്സിയുടെ റാപ്പ് ഗാനമായിരുന്നു. രാത്രി പന്ത്രണ്ടുമണിയോടെയാണ് ഡബ്സി വേദിയിൽ എത്തിയത്. ആ സമയത്തും ഡബ്സിയെ കേൾക്കാനായി കലാസ്വാദകർ കാത്തുനിൽക്കുന്നുണ്ടായിരുന്നു. തൊട്ടുമുമ്പ് നടന്ന പരിപാടിക്കിടയിലും ആളുകൾ ഡബ്സി, ഡബ്സി എന്നു വിളിച്ചു പറയുന്നുണ്ടായിരുന്നു. ഇവരെയെല്ലാം നിരാശപ്പെടുത്തുന്ന തരത്തിലായിരുന്നു തുടർന്നുള്ള പ്രോഗ്രാം.
അതേസമയം, റാപ്പ് ഗാനങ്ങൾക്ക് പറ്റിയ തരത്തിലുള്ള ഓഡിയൻസോ സ്റ്റേജോ അല്ല ജിദ്ദയിൽ ഒരുക്കിയിരുന്നത് എന്ന വിമർശനവമുണ്ട്. ആരാധകർക്കിടയിൽ അവരുടെ ആവേശത്തിൽ അവതരിപ്പിക്കുന്ന ഡബ്സിയുടെ പരിപാടി വൻ വിജയമാകാറുണ്ട്. ജിദ്ദയിലെ പരിപാടിയിൽ റാപ്പർക്ക് സ്റ്റേജിൽനിന്നിറങ്ങി ആരാധകർക്കിടയിലേക്ക് എത്താനുള്ള സൗകര്യം ഒരുക്കിയിരുന്നില്ല. ആരാധകരും ഡബ്സിയും തമ്മിൽ ഏറെ ദൂരമുണ്ടായിരുന്നു. പരിപാടി ജനത്തെ ആവേശത്തിലാറാടിക്കാതിരിക്കാനുള്ള കാരണങ്ങളിൽ ഒന്നായിരുന്നു ഇത് എന്നും വാദമുണ്ട്.
യുവജനങ്ങൾക്കിടയിൽ ഏറെ ആരാധകരുള്ള റാപ്പറാണ് ഡബ്സി. നിരവധി സിനിമകളിൽ ഹിറ്റ് പാട്ടുകൾ ഡബ്സിയുടേതായുണ്ട്. യുവാക്കളെ ആവേശം കൊള്ളിക്കുന്ന പാട്ടുകളാണ് ഡബ്സിയുടേതായി പുറത്തുവന്നവയിൽ ഏറെയും.
ഏറ്റവും ഒടുവിൽ നിവിന്‍ പോളി പ്രധാന വേഷത്തില്‍ എത്തിയ മ്യൂസിക് ആല്‍ബം ‘ഹബീബീ ഡ്രിപ്പി’ൽ ഡബ്സി ഒരുക്കിയ ഗാനവും വൈറലായിരുന്നു. സ്‌റ്റൈലിഷ് ലുക്കില്‍, വ്യത്യസ്ത ഗെറ്റപ്പുകളിലാണ് നിവിന്‍ പോളി ഈ ഗാനത്തില്‍ എത്തിയിരിക്കുന്നത്. ഗള്‍ഫിലാണ് ഈ ഗാനം പൂർണമായും ചിത്രീകരിച്ചിരിക്കുന്നത്.