ദമാം: സൗദി കിഴക്കൻ പ്രവിശ്യയിലെ പ്രവാസി കാൽപന്ത് കൂട്ടായ്മയായ ഡിഫയുടെ സഹകരണത്തോടെ ബദർ ഫുട്ബോൾ ക്ലബ് സംഘടിപ്പിക്കുന്ന ഇലവൻസ് ടൂർണമെന്റിന് ജൂലൈ പതിനൊന്നിന് വെള്ളിയാഴ്ച തുടക്കമാകുമെന്ന് ടൂർണമെന്റ് കമ്മിറ്റി അറിയിച്ചു. ബദർ മെഡിക്കൽ സെന്റർ ഓഡിറ്റോറിയത്തിൽ നടന്ന പരിപാടിയിൽ ടൂർണമെന്റ് ലോഗോയും ഫിക്സറും പ്രകാശനം നടത്തി.
എസ് ടി സി ബാങ്ക് മുഖ്യ പ്രായോജകരായ ടൂർണമെന്റിൽ കിഴക്കൻ പ്രവിശ്യയിലെ പ്രമുഖരായ 17 ടീമുകൾ മാറ്റുരയ്ക്കും. സൗദിയിലെ വിവിധ പ്രവിശ്യയിലെ പ്രമുഖ കളിക്കാരും നാട്ടിൽ നിന്നുള്ള സൂപ്പർ താരങ്ങളും വിവിധ ടീമുകൾക്ക് വേണ്ടി ബൂട്ടണിയും.
ഉദ്ഘാടന പരിപാടിയിലും മറ്റു മത്സര ദിവസങ്ങളിലും ദമാമിലെ സാമൂഹിക സാംസ്ക്കാരിക കലാ കായിക മേഖലയിലെ പ്രമുഖരുടെ സാന്നിധ്യമുണ്ടാകുമെന്ന് സംഘാടകർ അറിയിച്ചു. മേളയുടെ ലോഗോ പ്രകാശനം ഡിഫ പ്രസിഡന്റ് ഷമീർ കൊടിയത്തൂർ ടൂർണമെന്റ് കമ്മിറ്റി ചെയർമാൻ റഫീഖ് കൂട്ടിലങ്ങാടിക്ക് നൽകി നിർവ്വഹിച്ചു. ഡിഫ ജനറൽ സെക്രട്ടറി റഷീദ് മാളിയേക്കൽ, രക്ഷാധികാരി മുജീബ് കളത്തിൽ, ടെക്നിക്കൽ കമ്മറ്റി അംഗം റാസി വള്ളിക്കുന്ന് , ബദ്ർ ഫുട്ബോൾ ക്ലബ് രക്ഷാധികാരി റഷീദ് കൊളക്കൽ, ക്ലബ് പ്രസിഡന്റ് മഹ്‌റൂഫ് , സെക്രട്ടറി ഷഹീം മങ്ങാട് തുടങ്ങിയവർ പങ്കെടുത്തു. വിവിധ ക്ലബുകളുടെ ഭാരവാഹികളും പരിപാടിയിൽ പങ്കെടുത്തു.