ജിദ്ദ: കേരള സംസ്ഥാന വനിതാ മുസ്ലിം ലീഗ് സെക്രട്ടറിയും മലപ്പുറം ജില്ലാ പഞ്ചായത്ത് മുൻ സ്റ്റാന്റിംഗ് കമ്മിറ്റി ചെയർപേഴ്സണുമായ സറീന ഹസീബിന് ജിദ്ദ കെ.എം.സി.സി സെൻട്രൽ കമ്മിറ്റി വനിതാ വിങ്ങിന്റെ നേതൃത്വത്തിൽ ജിദ്ദയിൽ സ്വീകരണം നൽകി. പ്രവാസി വനിതകളുടെ സാമൂഹികവും സാമ്പത്തികവും വിദ്യാഭ്യാസപരവുമായ പുരോഗതിയെ മുൻനിർത്തി ചർച്ചകൾ നടന്നു. പ്രവാസി കുടുംബങ്ങൾക്കിടയിൽ വനിതാ വിങ്ങിന്റെ പ്രവർത്തനങ്ങൾ വിപുലമാക്കുന്നത് സംബന്ധിച്ച് ചർച്ച നടത്തി.
മുസ്ലിം ലീഗ് പ്രസ്ഥാനം വനിതകൾക്ക് വലിയ പ്രാധാനം നൽകുന്നുണ്ടെന്നും അവരുടെ സർവോന്മുഖമായ പുരോഗതിക്ക് വലിയ സംഭാവന നൽകുന്നുണ്ട്. ഇന്ത്യയിലെ മത-ന്യൂനപക്ഷ പിന്നോക്ക വിഭാഗങ്ങളെ മുഖ്യധാരയിലേക്ക് കൊണ്ടുവരുന്നതിനും അവരുടെ അവകാശങ്ങൾ സംരക്ഷിക്കുന്നതിനും മുസ്ലിം ലീഗ് വലിയ പോരാട്ടമാണ് നടത്തുന്നതെന്നും അവർ പറഞ്ഞു. വനിതാ വിങ്ങിന്റെ നിലവിലെ പ്രവർത്തനങ്ങളെ അഭിനന്ദിച്ച അവർ, വരും കാലങ്ങളിൽ കൂടുതൽ സജീവമായി പ്രവാസി കുടുംബങ്ങൾക്കിടയിൽ പ്രവർത്തിക്കാൻ വനിതാ വിങ്ങിന് സാധിക്കട്ടെയെന്നും അവർ ആശംസിച്ചു.
ജിദ്ദ കെഎംസിസി സെൻട്രൽ കമ്മിറ്റി വനിതാ വിങ് പ്രസിഡന്റ് മുംതാസ് പാലോളി അധ്യക്ഷത വഹിച്ചു. ജനറൽ സെക്രട്ടറി ഷമീല മൂസ സ്വാഗതം ആശംസിച്ചു. വനിതാ വിങ് ഭാരവാഹികളായ സലീന ഇബ്രാഹിം, ഹസീന അഷ്റഫ്, ജംഷിന മാമുനിസാർ, നസീഹ മർജാൻ, നസീമ ഹൈദർ, ബസ്മ സാബിൽ, ഇർഷാദ ഇല്യാസ്, സുരയ്യ കാരി, ഹാജറ ബഷീർ എന്നിവർ സംബന്ധിച്ചു. ട്രഷറർ കുബ്ര ലത്തീഫ് നന്ദി പറഞ്ഞു.