ദമാം: പ്രവാസി വെല്‍ഫെയര്‍ സൗദി അറേബ്യ ദമാം ദക്ഷിണകേരള കമ്മറ്റി കുടുംബ സംഗമം സംഘടിപ്പിച്ചു. വെല്‍ഫയര്‍ പാര്‍ട്ടി സംസ്ഥാന പ്രസിഡന്റ് റസാക്ക് പാലേരി നയിക്കുന്ന സാഹോര്യപദയാത്ര ദമാം റീജിയണല്‍ കമ്മറ്റി ആക്ടിംഗ് പ്രസിഡന്റ് അനീസ മെഹബൂബ് ഉദ്ഘാടനം ചെയ്തു. കേന്ദ്ര സംസ്ഥാന സര്‍ക്കാറുകളുടെ ജനദ്രോഹ നടപടികളില്‍ പ്രതിപക്ഷത്തുനിന്നും ശബ്ദമുയര്‍ത്താനും വ്യത്യസ്തങ്ങളായ വിഷയങ്ങളില്‍ ശ്രദ്ധേയമായ ഇടപെടലുകള്‍ നടത്താനും വെല്‍ഫെയര്‍ പാര്‍ട്ടിക്ക് സാധിച്ചിട്ടുണ്ടെന്ന് അനീസ മെഹബൂബ് പറഞ്ഞു. പ്രവാസി വെല്‍ഫെയര്‍ അഖില സൗദിയ ജനറല്‍ സെക്രട്ടറി ഷബീര്‍ ചാത്തമംഗലം മുഖ്യപ്രഭാഷണം നടത്തി. കഴിഞ്ഞ പതിനൊന്ന് വര്‍ഷക്കാലമായി സൗദി അറേബ്യയില്‍ പ്രവര്‍ത്തിക്കുന്ന പ്രവാസി വെല്‍ഫെയറിന് വിവിധ ജനസേവന ജീവകാരുണ്യ മേഖലയില്‍ സ്തുത്യര്‍ഹമായ പങ്കുവഹിക്കാന്‍ സാധിച്ചിട്ടുണ്ടെന്നും അദ്ദേഹം പറഞ്ഞു.
പ്രവാസി വെല്‍ഫെയര്‍ ദക്ഷിണകേരള കമ്മറ്റി പ്രസിഡന്റ് ഷെമീര്‍ പത്തനാപുരം അധ്യക്ഷത വഹിച്ചു. ഈസ്റ്റേണ്‍ പ്രൊവിന്‍സ് പ്രസിഡന്റ് അബ്ദുല്‍ റഹീം തിരൂര്‍ക്കാട് സമാപനപ്രഭാഷണം നടത്തി. പ്രൊവിന്‍സ്, ജില്ലാ എക്‌സിക്യൂട്ടീവ് അംഗം ഫൈസല്‍ കോട്ടയം പരിപാടിയില്‍ സംസാരിച്ചു. ജനറല്‍ സെക്രട്ടറി ജോഷി പാഷ സ്വാഗതവും എക്‌സിക്യൂട്ടീവ് അംഗം അബ്ദുല്ല സൈഫുദ്ദീന്‍ നന്ദിയും പറഞ്ഞു. ദുആ ദനീന്‍ ഗാനവും ഫൈസല്‍ കോട്ടയം കവിതയും ആലപിച്ചു. ജില്ലാ കമ്മറ്റി ജനസേവന വിഭാഗം കണ്‍വീനര്‍ ആഷിഫ് കൊല്ലം, ട്രഷറര്‍ ഷാഹിന ഫൈസല്‍, ബിജു പൂതക്കുളം എന്നിവര്‍ നേതൃത്വം നല്കി.