റിയാദ്: മസ്തിഷ്‌കാഘാതത്തെ തുടര്‍ന്ന് റിയാദിലെ ആശുപത്രിയില്‍ മരിച്ച മലയാളിയുടെ മൃതദേഹം നാട്ടിലെത്തിച്ചു. തിരുവനന്തപുരം ചിറയിന്‍കീഴ് തോട്ടക്കാട് ചെമ്മരുതി പനയറ ഗീത വിലാസത്തില്‍ വേലുക്കുറിപ്പിന്റെ മകന്‍ സുരേഷ് ഏപ്രില്‍ 18നാണ് റിയാദ് ശുമൈസിയിലെ കിങ് സൗദ് ആശുപത്രിയില്‍ മരിച്ചത്. 15 ദിവസം മുമ്പ് രക്തസമ്മര്‍ദ്ദം ഉയര്‍ന്നതിനെ തുടര്‍ന്ന് ആശുപത്രിയില്‍ പ്രവേശിപ്പിച്ചതായിരുന്നു. റിയാദ് ന്യൂ ഇന്‍ഡസ്ട്രിയല്‍ സിറ്റിയിലെ ഒരു സ്വകാര്യ കമ്പനിയില്‍ 15 വര്‍ഷമായി ജോലി ചെയ്യുകയായിരുന്നു ഇദ്ദേഹം. 23 വര്‍ഷമായി സൗദിയിലുണ്ട്. ഭാര്യ: പ്രസന്നകുമാരി. മക്കള്‍: ആദിഷ് സുരേഷ്, ആനന്ദ് സുരേഷ്.
റിയാദില്‍ നിന്ന് സൗദി എയര്‍ലൈന്‍സ് വിമാനത്തില്‍ ജിദ്ദ വഴി കൊച്ചിയില്‍ ഞായറാഴ്ച രാവിലെയാണ് മൃതദേഹം എത്തിച്ചത്. ബന്ധുക്കള്‍ കൊച്ചിയിലെത്തി മൃതദേഹം ഏറ്റുവാങ്ങി സ്വദേശത്തേക്ക് കൊണ്ടുപോയി.നിയമനടപടികള്‍ പൂര്‍ത്തീകരിക്കാനും മൃതദേഹം നാട്ടിലയക്കാനുമുള്ള പ്രവര്‍ത്തനങ്ങള്‍ക്ക് ഒ.ഐ.സി.സി സെന്‍ട്രല്‍ കൗണ്‍സില്‍ അംഗം നാസര്‍ കല്ലറ നേതൃത്വം നല്‍കി. സുരേഷിന്റെ കമ്പനിയിലെ സഹപ്രവര്‍ത്തകരായ വിപിന്‍, സജി, മണി എന്നിവരും സഹായിക്കാന്‍ ഒപ്പമുണ്ടായിരുന്നു.