ദോഹ: ഖത്തറിൽ നിന്നും സ്വർണം കടത്താൻ ശ്രമിച്ച എട്ടുപേർ അറസ്റ്റിൽ. സ്വർണ്ണവുമായി ഹമദ് അന്താരാഷ്ട്ര വിമാനത്താവളം വഴി രാജ്യത്തിൽ നിന്നും പുറത്തു പോകാൻ ശ്രമിച്ചവരെയാണ് ഖത്തർ ആഭ്യന്തരമന്ത്രാലയ അധികൃതർ പിടികൂടിയത്. സ്വർണം കടത്താൻ ശ്രമിച്ച വ്യക്തികളെ പിടികൂടിയ ഓപ്പറേഷൻ്റെ തത്സമയ ദൃശ്യങ്ങൾ ആഭ്യന്തര മന്ത്രാലയത്തിലെ ക്രിമിനൽ ഇൻവെസ്റ്റിഗേഷൻ ഡിപ്പാർട്ട്‌മെൻ്റ് സോഷ്യൽ മീഡിയയിൽ പങ്കുവെച്ചു.
കുറ്റകൃത്യത്തിൽ പങ്കാളികളായ വിവിധ രാജ്യക്കാരായ എട്ട് പേരെ അറസ്റ്റ് ചെയ്തതായി മന്ത്രാലയം സോഷ്യൽ മീഡിയയിൽ അറിയിച്ചു. പ്രതികളിൽ നിന്നും സ്വർണ്ണത്തിന് പുറമേ പണവും മൊബൈൽ ഫോൺ ഉൾപ്പെടെയുള്ള വിലപിടിപ്പുള്ള സാധനങ്ങളും പിടിച്ചെടുത്തതായി ഖത്തർ ആഭ്യന്തര മന്ത്രാലയ അധികൃതർ അറിയിച്ചു. കൂടുതൽ നിയമനടപടിക്കായി പ്രതികളെ ബന്ധപ്പെട്ട അധികാരികൾക്ക് കൈമാറി. എന്നാൽ പിടിയിലാവർ ഏത് രാജ്യക്കാരാണ് എന്ന് ആഭ്യന്തരമന്ത്രാലയം വ്യക്തമാക്കിയിട്ടില്ല.