ജിദ്ദ – സംഘര്ഷം പൊട്ടിപ്പുറപ്പെട്ടതിനുശേഷം മിഡില് ഈസ്റ്റില് റദ്ദാക്കിയ വിമാന സര്വീസുകളുടെ എണ്ണം 23,000 കവിഞ്ഞു. ഇറാനുമായുള്ള യുദ്ധത്തിന്റെ പ്രത്യാഘാതങ്ങള് ആഗോള വ്യോമയാന മേഖലയെ കൂടുതല് വഷളാക്കിക്കൊണ്ടിരിക്കുകയാണ്. ഫെബ്രുവരി 28 മുതല് ഈ മേഖലയിലേക്കും തിരിച്ചും ഷെഡ്യൂള് ചെയ്തിരുന്ന ഏകദേശം 36,000 വിമാന സര്വീസുകളില് പകുതിയിലധികം റദ്ദാക്കപ്പെട്ടു. ഇത് യാത്രക്കാര്ക്ക് ഏകദേശം 44 ലക്ഷം സീറ്റുകള് നഷ്ടപ്പെടുത്തിയതായി ഏവിയേഷന് അനലിറ്റിക്സ് സ്ഥാപനമായ സിറിയത്തിന്റെ ഡാറ്റ പറയുന്നു.
ദുബായിലേക്കും തിരിച്ചുമുള്ള വിമാന സര്വീസുകള് നിര്ത്തിവെച്ചത് മാര്ച്ച് 7 വരെ നീട്ടാന് എമിറേറ്റ്സ് തീരുമാനിച്ചു. അബുദാബിയിലേക്കുള്ള വിമാന സര്വീസുകളുടെ സസ്പെന്ഷന് മാര്ച്ച് 6 വരെ നീട്ടിക്കൊണ്ട് സമാനമായ നടപടി സ്വീകരിച്ചു. ദോഹയില് സ്ഥിതി കൂടുതല് അനിശ്ചിതത്വത്തിലാണ്. ഖത്തര് എയര്വേയ്സ് അതിന്റെ എല്ലാ സര്വീസുകളും പുതിയ ഒരു അറിയിപ്പുണ്ടാകുന്നു വരെം നിര്ത്തിവെച്ചതായി സ്ഥിരീകരിച്ചു. ഇന്ന് രാവിലെ അതിന്റെ പ്രവര്ത്തന നിലയെ കുറിച്ച് പുതിയ അപ്ഡേറ്റ് നല്കുമെന്ന് കമ്പനി സൂചിപ്പിച്ചു.
ദുബൈ, ദോഹ, മനാമ, കുവൈത്ത്, ദമ്മാം, ബാഗ്ദാദ്, അമ്മാന്, ഖസബ്, കോപ്പന്ഹേഗന് എന്നിവയുള്പ്പെടെ പ്രാദേശിക, അന്തര്ദേശീയ ലക്ഷ്യസ്ഥാനങ്ങളിലേക്കുള്ള നിരവധി സര്വീസുകള് റദ്ദാക്കിയതായി ഒമാന് എയര് അറിയിച്ചു. മാര്ച്ച് 6 വരെ ഈ റദ്ദാക്കലുകള് തുടരുമെന്ന് പ്രതീക്ഷിക്കുന്നു. യൂറോപ്പില്, ജര്മ്മനി ജാഗ്രതാ നില ഉയര്ത്തി, തെഹ്റാന്, ബെയ്റൂത്ത്, തെല്അവീവ്, അമ്മാന്, എര്ബില് എന്നിവയുള്പ്പെടെ മേഖലയിലെ നിരവധി പ്രധാന തലസ്ഥാനങ്ങളിലേക്കും കേന്ദ്രങ്ങളിലേക്കുമുള്ള വിമാന സര്വീസുകള് മാര്ച്ച് 8 വരെ നീട്ടിയതായി ജര്മ്മനി അറിയിച്ചു.