റിയാദ്– കേളി കലാ സാംസ്കാരിക വേദിയുടെ പന്ത്രണ്ടാം കേന്ദ്ര സമ്മേളനത്തിന്റെ ലോഗോ പ്രകാശനം ചെയ്തു. ബത്ഹ ലൂഹ ഓഡിറ്റോറിയത്തില് നടന്ന ലോഗോ പ്രകാശന പരിപാടിയില് കേളി വൈസ് പ്രസിഡന്റ് രജീഷ് പിണറായി അധ്യക്ഷത വഹിച്ചു. രക്ഷാധികാരി സമിതി സെക്രട്ടറി കെപിഎം സാദിഖ് ഉദ്ഘാടനം നിര്വഹിച്ചു.
പതിനൊന്നാം സമ്മേളനത്തില് പ്രഖ്യാപിച്ച പദ്ധതികളില് ‘ഒരു ലക്ഷം പൊതിച്ചോര്’ പദ്ധതി ലക്ഷ്യം പൂര്ത്തീകരിച്ച് വരികയാണെന്ന് സാദിഖ് പറഞ്ഞു. രണ്ടാം പദ്ധതിയായ അംഗങ്ങള്ക്കുള്ള ഭവന നിര്മ്മാണ സഹായ പദ്ധതിയുടെ ഗുണഭോക്താക്കളെ സമ്മേളന നഗരിയില് പ്രഖ്യാപിക്കുമെന്നും അദ്ദേഹം അറിയിച്ചു.
റിയാദിലെ മലസ് മേഖലയില് താമസിക്കുന്ന കണ്ണൂര് സ്വദേശി സനീഷ് തയ്യാറാക്കിയ ലോഗോയാണ് പന്ത്രണ്ടാം കേന്ദ്ര സമ്മേളനത്തിന്റെ ഔദ്യോഗിക ലോഗോയായി തെരഞ്ഞെടുക്കപ്പെട്ടത്. ഫെബ്രുവരി 12, 13 തീയതികളിലായാണ് കേളിയുടെ പന്ത്രണ്ടാം കേന്ദ്ര സമ്മേളനം നടക്കുക.
പരിപാടിക്ക് ആശംസകള് അര്പ്പിച്ച് സെക്രട്ടറി സുരേഷ് കണ്ണപുരം, പ്രസിഡന്റ് സെബിന് ഇക്ബാല്, ട്രഷറര് ജോസഫ് ഷാജി, രക്ഷാധികാരി സമിതി അംഗങ്ങളായ ഫിറോഷ് തയ്യില്, സുരേന്ദ്രന് കൂട്ടായ്, കുടുംബവേദി സെക്രട്ടറി സീബ കൂവോട്, കേളി ജോയിന്റ് സെക്രട്ടറി മധു ബാലുശ്ശേരി, വൈസ് പ്രസിഡന്റ് ഗഫൂര് ആനമങ്ങാട് എന്നിവര് സംസാരിച്ചു.
സമ്മേളന സംഘാടക സമിതി ജോയിന്റ് കണ്വീനര് നൗഫല് സിദ്ദീഖ് സ്വാഗതവും, കേന്ദ്ര കമ്മിറ്റി അംഗം രാമകൃഷ്ണന് ധനുവച്ചപുരം നന്ദിയും പറഞ്ഞു.