കുവൈത്ത് സിറ്റി– വിയന്നയിൽ സംഘടിപ്പിച്ച ഒപെകിന്റെ 9-ാമത് അന്താരാഷ്ട്ര സെമിനാറിൽ കുവൈത്ത് – ഇന്ത്യ ഊർജ മേഖലയിലുള്ള സഹകരണം കൂടുതൽ ശക്തമാക്കാൻ ശ്രമം. സെമിനാറിൽ കുവൈത്ത് എണ്ണ മന്ത്രി താരിഖ് സുലൈമാൻ അൽ-റൂമിയും ഇന്ത്യയുടെ പെട്രോളിയം, പ്രകൃതി വാതക വകുപ്പ് മന്ത്രി ഹർദീപ് സിംഗ് പുരിയും തമ്മിൽ ഉന്നതതല ചർച്ച നടന്നു.
ഇരു രാജ്യങ്ങളും പരസ്പരപരമായി ഗുണനിലവാരമുള്ള ഊർജ പങ്കാളിത്തം വിപുലപ്പെടുത്തുന്നതിനുള്ള സാധ്യതകളെക്കുറിച്ചും ചർച്ചകൾ നടത്തിയതായി മന്ത്രി ഹർദീപ് സിംഗ് പുരി പറഞ്ഞു. ഇന്ത്യയുടെ ഊർജ സുരക്ഷയും ഭാവിയിലെ സഹകരണ പദ്ധതികളുമാണ് കുവൈത്ത് എണ്ണ മന്ത്രിയുമായി ചർച്ച ചെയ്തതെന്നും അദ്ദേഹം അറിയിച്ചു.
ഇന്ത്യയുടെ പ്രധാന ഊർജ പങ്കാളിയാണ് കുവൈത്ത്. ഇന്ത്യയിലേക്ക് ക്രൂഡ് ഓയിൽ വിതരണം ചെയ്യുന്നതിൽ ആറാം സ്ഥാനത്താണ് കുവൈത്ത്. എൽപിജി വിതരണം ചെയ്യുന്ന രാജ്യങ്ങളിൽ നാലാം സ്ഥാനത്തും ഹൈഡ്രോക്കാർബൺ വ്യാപാര പങ്കാളികളിൽ എട്ടാം സ്ഥാനത്തുമാണ് കുവൈത്ത്.