മനാമ – ഇറാനിലെ ഭീകരര് വഴി ഇറാന് റെവല്യൂഷണറി ഗാര്ഡിന് വേണ്ടി ചാരവൃത്തി നടത്തിയതിന് നാല് സ്വദേശികളെ അറസ്റ്റ് ചെയ്തതായും വിദേശത്തേക്ക് രക്ഷപ്പെട്ട അഞ്ചാമത്തെ പ്രതിയെ തിരിച്ചറിഞ്ഞതായും ബഹ്റൈന് ആഭ്യന്തര മന്ത്രാലയം ഇന്ന് പുലര്ച്ചെ അറിയിച്ചു. മുര്തദ ഹുസൈന് അവാല് (25), അഹ്മദ് ഈസ അല്ഹായികി (34), സാറ അബ്ദുന്നബി മര്ഹൂന് (36), ഇല്യാസ് സല്മാന് മിര്സ (22) എന്നിവരാണ് അറസ്റ്റിലായത്. അലി മുഹമ്മദ് ഹസ്സന് അല്ശൈഖ് (25) ആണ് വിദേശത്തേക്ക് രക്ഷപ്പെട്ടത്.
ആദ്യം അറസ്റ്റിലായ വ്യക്തി, സംഘടനാ നിര്ദേശപ്രകാരം പ്രവര്ത്തിക്കുകയും മറ്റുള്ളവരുടെ സഹായത്തോടെ, ബഹ്റൈനിലെ സുപ്രധാനവും പ്രധാനപ്പെട്ടതുമായ സ്ഥലങ്ങളുടെ ഫോട്ടോകള് എടുക്കാനും കോര്ഡിനേറ്റുകള് നേടാനും ഉയര്ന്ന റെസല്യൂഷന് ഫോട്ടോഗ്രാഫി ഉപകരണങ്ങള് ഉപയോഗിച്ചതായും തുടര്ന്ന് ഇവ എന്ക്രിപ്റ്റ് ചെയ്ത സോഫ്റ്റ്വെയര് വഴി ഇറാന് റെവല്യൂഷണറി ഗാര്ഡിന് കൈമാറിയതായും അന്വേഷണങ്ങളില് കണ്ടെത്തി.
ഇറാന് ആക്രമണത്തിന്റെ പ്രത്യാഘാതങ്ങളുമായി ബന്ധപ്പെട്ട വീഡിയോകള് ചിത്രീകരിച്ച് പോസ്റ്റ് ചെയ്തതിനും, ഇറാന് ആക്രമണത്തോട് അനുഭാവം പ്രകടിപ്പിച്ചതിനും, രാജ്യത്തിനെതിരായ ഇറാന് ആക്രമണങ്ങളെ പ്രശംസിച്ചതിനും മഹത്വവല്ക്കരിച്ചതിനും ആറ് പേരെ അറസ്റ്റ് ചെയ്തതായും ആഭ്യന്തര മന്ത്രാലയം അറിയിച്ചു. പൊതുജനാഭിപ്രായം തെറ്റിദ്ധരിപ്പിക്കാനും, സ്വദേശികളിലും പ്രവിസികളിലും ഭയം വിതക്കാനും, സുരക്ഷക്കും ക്രമസമാധാനത്തിനും ദോഷം വരുത്താനും സാധ്യതയുള്ള വീഡിയോകള് പ്രതികള് അവരുടെ സോഷ്യല് മീഡിയ അക്കൗണ്ടുകളില് പങ്കിട്ടതായി മന്ത്രാലയം കൂട്ടിച്ചേര്ത്തു. അലി ഗാസി അബ്ദുല്ല, അലി ഹുസൈന് ഈസ, അബ്ദുഅലി അല്നകാല്, അഹ്മദ് മിര്സ മൂസ, അലി ഹുമൈദ് അലി, ഹുസൈന് ഖലീല് ഇബ്രാഹിം എന്നിവരാണ് അറസ്റ്റിലായത്. എല്ലാവരും സ്വദേശികളാണ്.
ആവശ്യമായ നിയമ നടപടികള് സ്വീകരിച്ചിട്ടുണ്ടെന്നും പ്രതികളെ പബ്ലിക് പ്രോസിക്യൂഷന് കൈമാറിയിട്ടുണ്ടെന്നും മന്ത്രാലയം സ്ഥിരീകരിച്ചു. നിയമപരമായ പ്രത്യാഘാതങ്ങള് ഒഴിവാക്കാനും രാജ്യത്തിന്റെ സുരക്ഷ നിലനിര്ത്താനും ഔദ്യോഗിക ഉറവിടങ്ങളില് നിന്ന് വിവരങ്ങള് നേടണമെന്നും സ്ഥിരീകരിക്കാത്ത വീഡിയോകളോ വാര്ത്തകളോ പങ്കിടുന്നതില് നിന്നും വീണ്ടും പ്രസിദ്ധീകരിക്കുന്നതില് നിന്നും വിട്ടുനില്ക്കണമെന്നും ബഹ്റൈന് ആഭ്യന്തര മന്ത്രാലയം എല്ലാവരോടും ആവശ്യപ്പെട്ടു.